Dəm ğazi çanədə odəmış tələf kardə

Az.R-ədə har sor xeyli odəm çe dəm ğaziku zəhrəlud və tələf bedə. Hokumət çimi statistika elan kardedəni. Mütəxəssison fikir jıqoe ki, ım səbəbiku zərərdidə və həlok bıə odəmon miğdar har sor 500 -ku tosə 1 həzo nəfərie.

Martə manqi 4-ədə Sumğayitədə i qılə ailə 6 nəfər, çəvonədə 3 nəfər hırdən, dəm qazi nəticədə tələf bıe. Im faciə bə nav dəm ğazi "Femida 007" sayti redaktor Əyyub Kərimov kıştışe. Həmonə rujonədə ğazi Lankoni şəhərədə 2 nəfər, ım rayoni Balığçilər ğəsəbədə 3 nəfər zəhrəlud kardışe. Çok bıe ki, əvoni vaxtədə bə mərizxonə rosnie və çəvon jimoni xilas karde mumkun bıe. Martə manqi 7-minə ruji moə deştə 2 qılə hırdəni ğaziku zəhrəlud bin. Mərizxonədə həmonə 2 nəfər əğıli xilas karde mumkun nıbe.

Səhiyyə Vəzarəti Klinik Tibbi Mərkəzi Toksikoloqiya şebəku bə "Azadlıq.info" sayti muraciəti cəvobədə votəşone ki, ımsori yanvarə manqədə 18 nəfər, fevralədə 15 nəfər, martə manqi sıftənə 6 rujədə  4 nəfər de dəm ğazi zəhrəlud bıe diaqnozi bə çəvon Klinika vardəşone. Im statistika iqlə bə Boku cəmiyyəti aide. Diqər şəhər və rayoni rəğəmon bəvon aidiyyət nişe. Im sayt həmən nıvıştedə ki, jıqo facion səbəbonədə qıleyən ğazi kifayət ğədərədə təmiz nıkardeye. Çand sor bə nav Sənaye və Enerqetika vəzir mərhum Natiğ Əliyev etiraf kardedəbe ki, Respublikadə ğaz emal zavodon hasil bıə ğazi cəmi 60 %-i təmiz karde zuədən. Bı səbəbən əmandənə ğazi çe zəhərinə umjənonku təmiz nıkardə bə istehlakə şəbəkə vadoə bedə.

Natəvonon Huğuğon Mudafiə Komitə sədr Mirvari Ğəhrəmanlıən votəşe ki, çanədə Fevğəladə Halon Vəzarət və "Azəriğaz" çe ım faciəon səbəbi tədğiğ nibəkarde, qınokaron bə məsuliyyət cəlb nibəben, jıqo bədbəxtə hadison miğdar həniən vey bəbe.