Nəvuzə idəvədə ərzaği ğıymət boho bıə

Har sor Nəvuzə idəvədə Az.R vıjoronədə ərzağə məhsulon ğıymət boho bedə. Çimi vəy se ro "Ərzağə məhsulon tədaruk və təchizat" Ojə Səhmdarə Cəmiyyəti Boku çand qılə rayononədə di təsərrufati məhsulon yarmarka təşkil kardəşe. Im yarmarkon şanbə və işanbə rujon dəvunidən, har ruj bə vıjoron 70 nomədə 30 ton məhsul bekardedən.

"Maide.az" bə "Deyerler.org" sayti istinadən xəbə dodə ki, ım OSC-i təşkil kardə idəvə yarmarkon bə ğıyməton erjon bıe anəhoyən təsir karde zınəş ni. Boku vıjoronədə əhavaton bə sayti muxbiri votəşone ki, dəvardə soronədə odəmon idə çiçəkili de kilo əhırin, ısət de ğrəmi hıridən. Çunki ğıyməton bə ponə soron nisbətədə xeyli ros bıə. Vizə ləpə kilo bə 22-25 mənot, fındığ bə 13-15 mənot, kişmiş 12-18 , hışkə xımo 14 mənot, sefçək 8-15, kuə donə 15, sınci 6-8 mənote. Mivə - tərəvəzi qıymətonən 20-30 kopik ziyod bıən.

Əvon ğeyd kardəşone ki, yarmarkadə ğıyməton de vıjori məzənnə arədə fərğ vey kame. Məsələn "28 may" metro stansiya tono onoə  yarmarkadə vizə ləpə 17-22 mənot, badam 22, sefçək 8-15, kişmiş 12-15 mənote. Əhavaton həmən votəşone ki, Nəvuzə idi nezi ğıyməton tikiən boho bəben.

Az.R Statistika Komitə elan kardəşe ki, 2018-minə sori yanvar - fevralə manqonədə məmləkətədə ərzaği ğıymət 5,8%, ğeyri - ərzaği ğıymət isə 4,7% boho bıə.