Boku hokuməti dini ədəbiyyaton həvate səpe məhdudiyyət noəşe

Qurcistani Mısılmonon İdarə (QMİ) ıştə nəşr kardə dini kitobon təğdimatə mərasim dəvuniəşe. "Arannews" bə "İslamazeri.com" sayti əsasən xəbə dodə ki, bı tədbirədə həmonə İdarə şeyx Hacı Ramin İqidov, İroni İslamə Respublika Qurcistanədə Səfarəti Mədəniyyətə Mərkəzi sədr Muctəba Kamranifərd, Beynəlxalğə "Əl-Mustəfa" Universiteti numayəndə Hacı Davud Zare və həniən diqər ictimai və dini xadimon iştirakşon bıə.

Şeyx Hacı Ramin İqidovi bə tədbiri iştirakəkon məlumat doəşe ki, orəxnə 4 sorədə QMİ 50 nomədə de 100 həzo tiraji dini kitob, umumən isə de 300 həzo tiraji xeyli broşura, təğvim və jurnalon nəşr kardəşe. Ğıroni-Kərimən  Azərbaycani zıvonədə de 5 həzo tiraji çap kardə bıə. Bı koədə ey bə İİR Qurcistanədə Mədəniyyətə Mərkəzi, "Əl-Mustafa" Universiteti, həmən bə "Parlaq İmzalar" nəşriyyatı ıştə minnətdarəti izhar kardışe.

Çəyo Muctəba Kamranifərdi, Hacı David Zare, çe Marneuli Sər axund və İmom Rza (ə) nominə mədrəsə mudir Hacı Əziz Nəbiyevi votemon kardəşone, dini təbliğati koonədə bə QMİ fəaliyyəti barzə ğıymət doəşone.

Martə manqi 6-ədə Az.R Parlamenti bə İnzibati Xəto Məcəllə 516-minə maddə əvəzon təsdiğ kardəşe. Çimi bəçəton çe İcra Hakimiyyəti təftişiku dəvardə dini kitobon de çey icazə fəaliyyət nişon doə məxsusi dukononədə həvate mumkun bəbe. Im ğaydə darıştə şəhrıvand 2000-2500 mənot, vəzifə soybon 8 - 9 həzo, huğuği şəxson 20-25 həzo mənot cərimə bəben, həmonə kitobonən musadirə bəkarden.