Az.R şəhrıvandon boçi məmləkəti tərk kardedən
Martə manqi 15-də Bokuədə VI Qlobal Forumi ıştə ko bino kardəşe. Prezident İlham Əliyevi çey ojbemonə tədbirədə nitğ ehandəşe. Votəşe ki, Az.R bekorəti və beçizəti kam bıe səviyyədə çe dınyo navonə devləton restədə ğəror qətəşe.
Hokuməti üzvonən ıştə votemononədə daima əhali firəvonə jimoni təmin karde həxədə qəpon jedən. Əmo paradoks vəziyyət bımədəy ki, ısət şəhrıvandon məmləkəti tərk, bə xarici keşvəron muhacirət, bə çəvırey hokuməton pənohqoh se ro xahiş karde mutəmadi qıley holədey.
"Azadlıq.info" Almaniyadə azərbaycanıjə muhaciron bə vətən deportasiya bino bıe barədə bə əhandon məlumat doəşe. Çəvırey KİV ğeyri-leqalə miqrasiya biznesə şəbəkə ifşa kardəşone. Polisi de ım koy məşğul bıə qıley azərbaycanıji kədə 54 nəfər Az.R şəhrıvandi sənədon bə oşko bekardəşe. Almaniya Miqrasiya Xidməti elan kardəşe ki, tosə ısət 50 nəfər azərbaycanıj deportasiyaşon kardə. Çand həzo nəfəri muraciətən diə kardə mərhələdəy.
Fransadə Rəşad Əliyev və çey 6 nəfər ailə uzv kə dustəğ kardəşone, əvoni deport bəkarden. Elçin İbrahimov deştə 3 nəfər ailə uzvi bə Belçika pənoh bardəşbe. Ey əyo vəfot kardəşe, çey ailə uzvon deportasiya bəninin.
Azərbaycani Huğuğə Mudafiə Mərkəzi sədr Eldar Zeynalovi bə "Turan" İnformasiya Aqentiyyəti votəşe ki, Azərbaycano bə Avropa muhacirət kardəkəson miğdari barədə konkret rəğəm nişon doe çətine. Əvon əsasən bə İsveç, Hollandiya, Norveç, Belçika, Almaniya muhacirət kardedən.
Sosioloji Monitorinq Mərkəziən bə muhacirəti səbəbon dair parsəy dəvuniəşe. Respondeton 91% -i iğtisadi behrani nəticədə quzərani çətin bıe bımi əsasə səbəb nişon doəşone.
