Əliyevi antişiə siyasəti peştono çiç niyo bedə
Martə manqi əvvələdə Az.R Amerika İbə Ştatonədə Səfarəti, Amerika Konqresi, azərbaycanıjon Hyuston şəhəri icma və "Azərbaycan-İsrail Beynəlxalqə Assosasiya" numayəndon bə ım şəhəri yəhudion sinaqoq şin. Azərbaycani Hyustonədə Mədəniyyətə Mərkəzi sədr İradə Axundova bə sinaqoqi təmiri ro maddi koməq bə çey ravvini təğdim kardışe.
Həmonə rujonədə İlham Əliyevi bə ictimai - siyasi məsəlon dair koməkkar Əli Həsənoviən bə "Azərbaycan-İsrail Beynəlxalqə Assosasiya" sayti votışe ki, "Azərbaycan mısılmonə dınyoədə de ıştə nufuziku istifadə karde roy ərəbiə devləton və İstaili arədə əlağon, mısılmonon de yəhudion dustiəti munasibəton obaste ro cəhd kardedə".
"Azadlıq.info" sayt Əliyev hokuməti ım siyasət tənğıd kardışe nıvıştışe ki, "boştə oməc je nızınəkəs bo co kəsi ərıştə bırie pidəşe. Çok əbi ki, çəmə hokumət 25 sornə Ğərəboği problemi həll karde ro jıqo cəhd bəkey. Bə ərəbon de yəhudion problemi ıştə səy dənənəy."
"Arannews.com" saytiən ğeyd kardışe ki, Boku hokumət ıştə məmləkətədə məçiton rıjnidə, dəbastedə, AİŞ -ədə isə bo yəhudion sinaqoq bərpo kardedə.
İlham Əliyevi marti 16-ədə "Az.R və İsrail hokuməton bahəm Komissiya"də ıştə hokuməti uzvon tərkib təsdiğ kardışe. Bə ım Komissiya çe Boku hokuməti tərəfo 11 qılə vəzarəti, 3 qılə devlətə komitə, Mərkəzi Banki və Elmon Akademiya 16 nəfər səlahiyyətinə məmuron daxilin.
Orəxnə soronədə Əliyevi hokuməti həmən de Səudi Ərbıstani siyasi əlağon zumand karde bə nəzər bısənəmon, çey bəştə şiə şəhrvandon divon qəte, məmləkətədə şiə adət və ayinon ğədəğən karde, şiə ruhani və dini fəalon bə zindon dənoe səbəbi və Əliyevi bı əməlonədə niyyəti tamam oşko vinde bəzınemon.
