Boku - Tbilisi - Ğars osınə roy ağibət
Dəvardə sori oktyabrə manqədə de prezident İlham Əliyevi və hamsuə devləton hokumətə numayəndon iştiraki Boku - Tbilisi - Ğars osınə roy dəbdəbəninə obemonə mərasim dəvarde. Elan kardışone ki, ım roy okırnie 10 sor dəvom kardəşe, bı layihə Boku hokuməti tərəfo 1 milyard dollar vəsait məsrəf bıə.
"Azadlıq.info" "Azərbaycani Osınə Roon" Sərpuşə Səhmdarə Cəmiyyəti sədr Cavid Qurbanovi sıxanon bə əhandon nəzə rosniəşe. Ey votəşe ki, ım layihə inşa hələ dırıst bə orəx rəsə ni. Çey rabitə, işarə-siqnalizasiya sistem, ro dəvuniə mexanizmon nimənğul vəziyyətədey.
Eyən bə yod varde lozime ki, ponə sori İsveç huğuğ -muhafizə sistemi həmkaron "Bombardier" korporasiya Boku - Ğars osınə roy inşa koonədə de korrupsiya sxemi 85 milyon dollar vəsaiti dələmurd kardə fakton bə oşko bekardəşonbe.
Az.R məmuron de jıqo imitasiya roy devləti pulon dələmurd karde dair fakton kafi ğədərədəy. Həmonə tojə fakton qıley həxədə Meydan TV xəbə doəşe. Məlum bıə ki, bə Beyləqan rayoni İminə Şahverən di ğazə lulə okırniəşone. Diy mərkəzədə de ğazə baloni vasitə qıley ğoğən voşniəşone, respublika televizionən ım kəşəşone bə keşvəri təmoşəqəron nişon doəşone. Devləti Azər TAC informasiya Aqentiyyətiən ım tədbiri həxədə xəbə pevolo kardəşe, ki İminə Şahverən di de ğazi təchiz kardə bıə. Əmo diy camaat ım xəbə təkzib kardedən, votedən ki, bə çəvon kəon ğaz doəşon ni. Meydan TV ım xəbə pevolo kardə bəpeştə AzərTAC-i həmonə xəbə ıştə səhifəku moləşe.
