İİR Prezident Həsən Ruhani bə Az.R rəsmi səfər omə

İİR Prezident Həsən Ruhani marti 28-ədə bə Az.R rəsmi səfər omə . Boku Beynəlxalğə aeroportədə de fəxri ğərəvulə dastə huzuri Az.R Sər Naziri iminə muavin Yağub Eyyubov və diqər rəsmi şəxson bə çey pişvaz beşən.

Prezidenti ım səfər 2 ruj dəvom bəkarde, de İlham Əliyevi didor, 2 qılə keşvəri arədə sənaye, di təsərrufati, səhiyyə və turizmə həmkari əlağon inkişaf kardovnie barədə sənədon təsdiğ karde, Natəçolədə maşınsozi zavodi obemonə mərasimədə iştirak bə səfəri proqram daxil bıə məsəlonədey. Marti 29-ədə Bokuədə Azərbaycan-İron iğtisadi forumi dəvunieyən nəzərədə qətə bıə.

İİR Az.R-ədə sabiğ səfir Mehsun Pak Ayini bə "Trend.az" sayti de ım səfəri əlağədar votəşe ki, orəxnə 5 sorədə çəmə prezidenton de yəndı 10 kərəsən vey vindemonşon bıə. Isət Tehroni de Boku arə əlağon  bə strateji munasibəton peqardedə. Bı soronədə çəmə devləton iqlə iğtisadiyyat ne, həmən reqionədə əmniyyət və de terrorizmi mubarizə sahədən tədbiron vindəşone. Kaspi dıyo huğuği status, enerji əmniyyət, nəğliyyat, de narkotrafiki və ekstremizmi  bahəm mubarizə ısətnə səfərədə bo muzakirə ro vacibə məsəlonədey.

Pak Ayini həmən ğeyd kardəşe ki, İron Rusiya və Az.R arədə setərəfinə əlağon ım devləton arədə iğtisadi həmkarəti həniən inkişaf və ğoym bəkarde, ım 3 qılə keşvəron arədə bo avtomobil, osınə ro, dıyo nəğliyyati, kemruk, nat və ğazə sektori inkişaf kardovnie sahədə qirəvə şəraiton bə əməl bəvarde.