Rəcəbə manqi 13 Əmirəlmomin Əli (ə) mevludə ruje

De hicri ğəməri təğvimi rəcəbə manqi 13, de miladi təğvimi marti 31-minə ruj çe Həzrəte Əmirəlmomin Əli (ə) mubarək mevludə ruje. "İslamazeri.com" bə "Alhikmeh.org" sayti istinadən xəbə dodə ki, de ım idə ruji munasibəti dınyo şion İminə İmomi ziyarətqah ki, Nəcəf şəhərədey, təmom de vıli dərosniəşone.

Ali Rəhbər Ayətullah Seyid Əli Xamenei votəşe ki, Həzrəte Əli (ə) jimon  sərasər cihado, Xıdo roədə səbro, dini əsl mahiyyəti dərk karde, bəsirət və bə Xidəvande - Aləmi roziyəti nail be ro səyono ibarəte. Im jimon seyku bə po bo əmə dərs bənine, əmə bəpe Həzrəti jimoniku, rəftoriku, qəponku numunə peqətəmon. Tehroni dəvardə cımmə nomoji xətib Ayətullah Muvəhhidi Kermaniən votəşe ki, "İroni xalğ şion iminə imom Həzrəte Əli (ə) cihadiku ilham səşonbe ki, imperializmə ğıvvon vədə mandin və ğalib beşin".

Dınyo har vıronədə şion ıştə qiramiə İmomi mevludə ruji de ləyağəti ğeyd kardedən. Boku Şəhriyar nominə Mədəniyyətə kədə Əhli -beyt (ə) aşiğon de ım əzizə ruji munasibəti tədbir dəvuniəşone, Həzrəte Əli (ə) həxədə hədison qəp jəşone, şeeron votəşone. Im curə tədbir çe Rusiya Ulyanovsk şəhəri Əhli - beyt (ə) tərəfdaronən təşkil kardəşone. 

Qurcistani Bolinisi rayoni Zol-Quvəc diədən de rayoni din xadimon, ətrof dion əhali iştiraki de ım idə ruji munasibəti mərasim təşkil kardışone. Tədbir de Ğıroni tilavəti bino bıə, çəyo Bolinisi şəhəri sər axund Hacı İfrət Əhmədov, Qurcistani Mısılmonon İdarə şeyx Hacı Ramin İqidovi qəp jəşone, de Həzrəte Əli (ə) mevludi munasibəti məclisi iştirakəkon təbrik kardəşone. Məclis idə sufrədə de təam karde bə orəx rəsə.