Polison bə Nardarani faciə məhbusi ailə təzyiğ nişon dodən
Nardarani hadisə məhbusonədə qıleyən İbrahim Xudaverdiyeve. Martə manqi orəxnə rujonədə Nardarani ərazi polis rəisi muavin omə bə çəvon kə, çey jimoni həmro Həcər xanım de çey Malik Əjdər nominə kamsınninə fərzəndi bə polisə şebə bardəşe.
Məvotbən həmonə hırdəni Nəvuzə idəvədə bə Nardarani məhbuson əğılon idə təbriki dair qıley videorolik hozo kardəşebən, noəşebən bə "Yutub". Bə rolikədə ıştənən təbrik votəşebən. Im, bə Az.R şiəfobə polison rık omə. Həcər xanım polis şebədə bıə vaxtədə i dastə polis həmlə kardəşone bə Xudaverdiyevon kə, divoədə çe Taleh Bağırzadə şəkil dırniəşone. Bə vaxtədə çe Xudaverdiyevi həsı və kinə kədə bıən. Bəvon tars omən, təhdid kardəşone ki, həni çe Talehi şəkili enıhaşton, əks holədə polison bomen çəvon kədə Heydər Əliyevi şəkili ebəhaşten.
"Azadlıq.info" Nardarani diqər məhbus Əbulfəz Bunyadovi kəy polison tərəfo bə blokada se barədə xəbə doəşe. Bunyadov 2015-minə sori noyabri 26-ədə polison Nardarnədə hucum təşkil kardə kəy soybe. Polison bə vaxti əv de qolulə jəşonbe. Həmonə qolulon ısətən çe Bunyadovi bədənədəy. Əv iflic vəziyyətədey. Çey de diqər məhbus - Elxan İskəndərovi məhkəmə ısətən dəvom hestışe. Məhkəmə orəxnə iclas marti 16-ədə dəvarde, . Çə iclasi bəpeştə polison bə Əbulfəzi kə hiç kəsi - hətto ey mualicə kardə doktoriən vadodənin. Bunyadovi votəşe ki, çey qolulə yarəon ısətən ənuz hestışe, daim çey binti əvəz karde lazime. Əmo polison ımi, həmən çımı təbii ehtiyacon icra karde ro bəmı komək kardə çımı nezə əvlodon çımı tono ome haştənin.
