Polison "Mısılmonon İbemonə Hərəkati" uzvon de dıminə Nardaranə faciə təhdid kardedən

Boku hokumət ıştə bə şiə fəalon divon qətə siyasəti dəvom kardedə. De "Mısılmonon İbemonə Hərəkati" sədr, siyasi məhbus Taleh Bağırzadə təklifi çe məmləkəti siyasi fəalono ibarət koalisiya soxtəşone, bə ğəror omən ki, har manqi 26-minə ruji qırdə bıbon, Nardarani hadisə həğiğəton, siyasi və dini məhbuson və çəvon ailə uzvon vəziyyəti muzakirə bıkon, bı barədə bə cəmiyyəti məlumaton bıdon.

Im koalisiya iminə qırdbemon marti 26-ədə sə qətışe. Ğəror ğəbul kardışone ki, 11 aprel prezidentə entexabati boykot karde barədə bə xalqi muraciət bıkon. İm bəyonat Xaliq Siyabovi handışe. Çey maşkinə ruji polison əv dəstqir kardəşone, bardışone bə "Bandotdel". Hərəkati uzvon bə "Azadlıq.info" məlumat doəşone ki, polison Xaliq kuəşone, işqəncə doəşone,təhdid kardəşone, votəşone ki, əqər ikərən koalisiya jəqo məşvərət dəvuno, bə şımə sə çe Nardarani hadisonsən bədtər mısibəton bəvardemon.  Bı səfə şımə jenonən dəstqir bəkardemon. Həmən votəşone ki, entexabaton bəpeştə Hərəkati səpe tojə repressiya təşkil bəkardemon.

Polison 2017-minə sori dekabri 20-ədən Xaliq Siyabovşon dəstqir kardəbe.

Nardarani faciə məhbusonədə Sahil Rzayevi pıə Xalid Rzayev bə Rakrus TV məlumat doəşe ki, Sahil bə karser dənoəşone, çe zindonxonəku xəbə məsəşe ki, ey bəştə intihar karde piəşe. Isət çey vəziyyət qone. Xalidi həmən ğeyd kardəşe ki, qımon heste ki, bə Sahili işqəncə doəşone. Əv bı barədə bə Ombudsman və Səlibe Sorxi şikayət bəkarde.

Sahil Rzayev Nardarani faciə bəpeştə Lankon şəhərədə dəstqir kardəşone, Sabunçi rayoni məhkəmə bo ey 6 sor 5 manq muddətinə zindonə cəzo bıriəşe.