Xarici məmləkəton çe Qurcistani iğtisadi təcrubəku istifadə kardedən

Az.R hokuməti bardə ğeyri -konstruktiv iğtisadi siyasət bey səbəb bedə ki, həni 4 sore ki, məmləkət çe iğtisadi behraniku beşe zınedəni, əhali quzəran rujbəruj qıvonin bedə.

İm, həmən keşvəri siyasi vəziyyətədə mışğılon bə əməl vardedə. Avropadə azərbaycanıjə muhaciron bə Əliyev hokuməti əleyh bino kardə aktiv siyasi aksiyon məmləkəti daxilədə bə sodə xalqi rəğbəti səbəb bıe. Imi hokumət nəinki bə əhəmiyyətinə islahat barde təşviğ nıkardışe, əksinə çey məmuron bə xalqi ım tələbon de do-dıjmoni , təhğiri reaksiya doşone, MM plenar iclasədə deputaton çe hokuməti tərəfdaron bə ım fəalon əleyh mubarizə barde ro ğıvvon səfərbər karde vanq kardışone.

Hərçənd ki, hamcuə Qurcistanədə iğtisadi behraniku beşe ro effektivə tədbiron bə jimon dəvunie nəticədə çey iğtisadiyyat sorbəsor inkişaf kardedə. İsət vəziyyət jıqoe ki, dınyo diqər məmləkətonədə Qurcidtani iğtisadi inkişafə model bə çəvon  maraği səbəb bedə və ey ıştə iğtisadiyyatədə tətbiğ kardedən. Məsələn, Qurcistani sabiğ İğtisadi inkişafi vəzir Vera Kobaliya bə "Priveli TV " votəşe ki, ey 2 sor  çe İndoneziya hokuməti muşavir ko kardışe. Əyo ticari və məhkəmə sistemədə bardə islahaton nəticədə ım məmləkəti ticarəti devriyyə 2 sorədə dınyo miğyasədə çe 109-minə vırəku bə 69-minə mevğe ros bıe.

Uzbəkistani Prezident Sevkət Mirzəyiyevi iğtisadi islahatonən beynəlxalğə ictimaiyyəti tərəfo dastəq sedə. Daşkənd hokuməti çe Qurcistani sabiğ Sər nazir Nika Qilauri bə ım təşəbbus cəlb kardəşe.

Prezident İlham Əliyev isə bəyon kardedə ki, çəvon məxsusi standarton hestışone. İştə məmləkəti bə ım standarton muvafiğ inkişaf bəkarden.

Əmo hələ ki, ım standarton nə bə iğtisadi inkişafi, nə bə şəhrıvandon quzərani səviyyə ros bıe, nəən ki, cəmiyyəti bə hakim zumrə bovə və etimadi ğoym bıe səbəb bıə ni.