Ankaradə setərəfinə sammit

Aprelə manqi 4-minə ruji İİR Prezident Həsən Ruhani bə Ankara rəsmi səfər kardışe. "Arannews.com" xəbə dodə ki, Turkiyə mudafiə vəzir Nurettin Canikli və İroni Ankaradə səfir Məhəmməd İbrahim Taherian bə İroni Prezidenti və ey muşayət kardə numayəndon pişvaz beşən.

Sayti həmən bə Turkiyə mass-madia istinadən Türkiyə, İron və Rusiya Prezidenton arədə setərəfinə sammiti bino bıe barədə xəbə pevolo kardəşe. Im sammiti bə nav Həsən Ruhani de Rəcəb Təyyib Ərdoğani, çəyo de Vladimir Putini arədə dıtərəfinə vindemononən sə qətəşone.

"Sputnik Azərbaycan"i bə cəmiyyəti xəbə rosniəşe ki, sammit bo mətbuati sərpuşə şəraitədə dəvardə. İminə xəbə çe İroni tərəfo omə. İroni Devlətə Televiziya məlumat doəşe ki, Həsən Ruhani Afrini idarə ki, haliyədə çe Turkiyə nəzarəti jitonoey, bə Suriya Ərteşi həvolə karde zərurət bəyon kardəşe. Lideron vindemononədə Suriyadə otəşbasti təmin karde, Astana və Soçi didoronədə ğəbul bıə ğəroron bə vırə rosnie, ım 3 qılə devləton tərəfo Suriyadə sulh və əmniyyəti təmin karde roədə həmkarəti ğoym karde barədə bəyonat ğəbil kardəşone. 

Tərəfon bə ğəror omən ki, nubəti setərəfinə sammit İronədə dəvuniə bıbo.

"Faktxəbər.com" saytən bə "Royters"i istinadən məlumat doəşe ki, AİŞ de ıştə Xəlice-Fars məntəğə həmkarə keşvəron bo apreli əvvəli nəzərədə qətə bıə sammit tosə sentyabrə manqi orəxi bə təxir eğandəşe