Taleh Bağırzadə bə huğuğə mudafiəkaron muraciət kardəşe

Aprelə manqi 6-minə ruji Boku Qonə Cinayəton Məhkəmədə Nardarani faciə məhbus Əbulfəz Bunyadov və Elxan İskəndərovi məhkəmə dəvom kardəşe. 9 nəfər polison bənə zərərdidə ifadə doəşone. Əmo çəvonədə hiç kəsi nə Əbulfəz, nəən Elxanşon zınə ni.

Çəyo Əbulfəzi bə hakimi votəşe ki, marti 19-ku polison hiç kəsi, çey yarə şışte, dəbaste ro hətto doktoriən bə çey tono vadondənin. Imən əlovə kardəşe ki, " əqər mınşon kışte pidəbu, bıdə ikərəti bıkışton ki, çımı con jıqo əzobiku bırəxo". Hakimiən votəşe ki, məhkəmə de ım məsələ əlağədar bə Sabunçi rayoni polisə şebə muraciət bəkarde.

Mısılmonon İbemonə Hərəkati sədr Taleh Bağırzadə de Əbulfəz Bunyadovi vəziyyəti qıvonin bıe əlağadar çe Ğobustani zindonxonəku bə huğuğə mudafiəkaron, umumən bə respublika ictimaiyyəti muraciət vığandəşe. "Vətən uğrunda" sayt həmonə muraciət bə əhandon edaştəşe. Taleh bə muraciətədə votedə ki,  ısət məmləkətədə hokumət çəmə çəşon vədə həmə insonə keyfiyyəton ğətl kardedə. Əbulfəz Bunyadov polison de qolulə jəşone, çey yarəon ısətən bey əziyyət dodə. Məhkəmə əv bə kə dustəğəti vadoəşe. Əmo polison ısət çey kə boeyo və bo çey əvlodon bə zindon peqordıniəşone. Hətto ey mualicə kardə doktoriən çey tono vadodənin.

Hacı Tale muraciəti orəxədə bə huğuğə mudafiəkaron, həmən bə beynəlxalqə təşkilaton muraciətən xahiş kardedə ki, "respublikadə vağeə bıə bə jıqo ğeyri-insaniə əməlon iqlə bənə huğuğə mudafiəkari ne, həmən bənə sofə vicdaninə insoni ıştə etirazə vanqi barz bıkən. Əmə ım məmləkətədə bo ədaləti bərğəror karde, bə ro dəqıniəmon. Xıdəvandi - aləm, həxi roədə mubarizə bardə odəmon vəhdəti sayədə çəmə ım recinə keşvəri bə cəhənnım peqordıniə odəmon cəzo bədo inşaallah.