De Az.R islamiə məhbuson həmrayəti ruj
Şion Haftminə imom Museyi-Kazem (ə) şəhadəti sorəqardış ımsor de Miladi təğvimi bə aprelə manqi 12-minə ruj eqınidə. Ərdəbili imom cumə Ayətullah Seyid Həsən Amili de ım munasibəti votəşe ki, ımi bənə "De islamiə məhbuson həmrayəti" ruji ğeyd karde səbəb əve ki, Musa ibn Cəfər (ə) şərafətinə jimoni veynə hissə zindonədə dəvardə.
Bəzi mısılmonə məmləkətonədə çe Peyğəmbər (s.ə.v.s) sofə islami həxədə qəpjəkəson de muxtəlifə vonə bə zindon dənodən. Az.R -ədən yolə dini alim və şəxsiyyəton bə zindonə jimon məhkum kardəşone. Əmo ım məhbuson çe sionist rejimi və Amerika məhbusonin. Çunki Amerika və sionist rejim bə Boku hokuməti şiddətinə təzyiğon nişon dodə ki, bə islamiə fəalon əleyh hərəkət bıko. Əqər hokumət çimiku intina bıko, əvon ey de bəşəriə huğuğon darışte vonə təhdid kardedən. İslamiə məhbusonədə bəzi kəson sionistə rejimi mustəntiğon tərəfo sual-cəvob karde, işqəncə doe bımi bənə subuti nişon doe bəbe.
Ayətullah Amili həmən ğeyd kardəşe ki, Amerika və sionistə rejimi çəmə nezədə bı qədər nufuzi soyb bıe bo əmə vey qon omedə. Çe Xıdəvandi-aləmiku orzumon hıste ki, çəmə jıqo əzizə odəmon çe zindono azad bıe ro şərait bə əməl bıvardo.
"Arannews.com" sayti Təbrizədə de Az.R islamiə məhbuson həmrayəti ruji təşkil karde barədə anons doəşe. Apreli 12-ədə Təbrizi Meydon məcitədə çe məğrib və işa nomojon bəpeştə de ım munasibəti mərasim dəbəvarde. Əyo hoccətul-islam vəl-muslimin Bərgi, çe Təbrizi məşhurə məddah və şairon iştirak bəkarden. "Benomə Şəhidon" və " Sarəllahi varison" nominə heyəton çe ım mərasimi təşəbbuskaronin.
