Az.R prezidentə entexabat
Apreli 11-ədə Az.R prezidenti entexabat dəvarde. Bı tədbirədə 8 nəfər bə prezidentəti namizəd iştirak kardedəbe. Mərkəzi Entexabatə Komissiya ım səçıni ərəfədə çe vıjniəkəson siyahi dərc kardışe. Siyasi təhlilqər Revşən Ağayev "Azadlıq.info" saytədə ğeyd kardışe ki, devləti rəsmi statistika respublikadə sədo doe huğuğinə şəhrıvandon miğdari 7 milyon 100 həzo nəfər nişon dodə.
Əmo MEK elan kardə siyahiədə cəvon miğdar təğribən 2 milyon nəfər, yəni 28% kame. Im vey yolə rəğəme. MEK sədr Məzahir Pənahov bəpe ım məsələ barədə səhih məlimat bıdo.
Revşən Ağayevi həmən ğeyd kardəşe ki, ım ğədər yolə fərği 2 qılə səbəb bıe bəzıne. Ya ım şəhrıvandon bənə zəhmətə miğranti bekorəti səbəbiku məmləkət tərk kardəşone, yaanki, məmləkəti daxilədə ıştə daimi jimon kardə məntəğku beşən, diqər məntəğonədə jimon kardedən, çəvrey bələdiyyə orğanon əvonşon bə rəsmi ğeydiyyat peqətə ni.
MEK sədr Pənahovi mətbuatə konfransədə votışe ki, Devlətə Statistika Komitə və çəmə Komissiya elan kardə rəğəmon arədə fərği bə şəhrıvandon ıştə sədo doe huğuği bə vırə rosnie mane bıe nibəzne. Har qıley şəhrıvand, çey nom vıjniəkəson siyahiədə hətto nıboən, ıştə jimon kardə vırə nezonə entexabatə məntəğədə sədo doe bəzıne. Bımi hiç qıley maneə ni.
Aprelə manqi 11 bo sanqo saat həşti MEK ıştə sıftənə məlumat elan kardəşe. Məlum bıe ki, vıjniəkəson 74 % -i entexabatədə iştirak kardəşone. APA aqentiyyəti bə ekzit-poli nəticon istinadən məlumat doəşe ki, səçınədə iştirak kardə vıjniəkəson 82 %-i bə İlham Əliyevi sədo doəşone. De ım fakti əlağədar TAP icra katib Əli Əhmədovi çəvon partiya namizəd İlham Əliyevi ım entexabatədə ğələbə bə dast varde elan kardışe.
