Ğərbi muşahidəəkon entexabati de ğanunə darıştəyon dəvarde ğeyd kardışone
Az.R prezidenti entexabatonədə iştirak kardə əvıjnon 86% bə İlham Əliyevi sədo doşone. Demiən ey 4 -minə kərə bı səfə bə 7 sor muddəti Az.R devləti sərdarəti karde səlahiyyət bə dast vardışe.
Im entexabati dınyo muxtəlifə təşkilatonku xeyli numayəndon muşahidə kardedəbin. Apreli 12-ədə Avropa Əmniyyət və Həmkarəti Təşkilati Muşahidə Missiya mətbuatə konfransədə səçıni huğuğ və azadion məhdud kardə, azad rəğabəti mevcud nıbe şəraitədə dəvarde ğeyd kardışe. Çəvon ım bəyanat bə hokumətpərəstə jurnaliston etirazi səbəb bıə, əvon bə Missiya uzvon səpe hucumavar bın. Muşahidəəkon ıştə bəyanati nimədə oqəte və zali tərk karde məcburiyyətədə mandən.
Entexabaton Monitorinq və Demokratiya Tədrisə mərkəziən ım səçıni həmə mərhələdə xeyli ğanuni darışte fakton muşahidə karde barədə bəyonat doəşe.
Avropa Şura Parlamentə Assambleya numayəndə heyətiən ım curə fikir bəyon kardəşe.
Muşahidə numayəndon prezidentə səçıni barədə votə neqativə fikron bə Boku hokuməti etirazi səbəb bıə. Əvonşon bə Xarici Koon Vəzarət vanq karde və Azərbaycani tərəfi ğəti etiraz bə çəvon nəzə rosnişone.
Prezidenti koməkkar Novruz Məmmədov, ım entexabatədə çe prezidenti səlahiyyətinə numayəndə Siyavuş Novruzoviən çe Ğərbi muşahidə numayəndon ım fikiron ğərəzin hisob kardışone.
Əmo məmləkəti daxilədən ım vıjniəy ğeyri - obyektiv dəvarde barədə xeyli neqativə fikron hestin. "Milli Şura", "Musavat" və ADP ım səçın soxtə zıneşone, çey nəticon nızıne elan kardışone.
Sosial şəbəkonədə azərbaycanıjə yuzeron vıjniə məntəğonədə ğeyri-ğanuniə hərəkəton həxədən xeyli fakton barədə xəbon dərc kardəşone.
