De islamiə məhbuson həmrayəti ruj

Rəcəbə manqi 25, de Miladi təğvimi apreli 12, çe şion haftminə imom Museyi Kazem (ə) şəhadətə ruje. Har sor dınyo şion ım sorəqardışi bənə de islami məhbuson həmrayəti ruji ğeyd kardedən.

"Nur-az.com" sayt xəbə dodə ki, Muğəddəsə Ğum şəhəri imom Sadiğ (ə) nominə məçitədə Azərbaycanıjə tələbon Museyi Kazem (ə) şəhadəti sorəqardış, həmən de islamiə məhbuson həmrayəti ruji dair qıley mərasim təşkil kardışone. Məclisədə Hoccətul-islam Sayvər və diqər ruhanion şion Haftminə imomi zindonədə kəşə məşəğğəton barədə qəp jəşone, muasirə zəmonədə İmomi roy dəvom kardəkəsonən  bə təzuiğ və təğibon məruz mande ğeyd kardəşone. Xətibon Az.R-ədən ruhani və dini fəalon de şər və bıhtonə ittihamon bə zindon dənoe həxədən votışone. Mərasimi iştirakəkon əzadarəti kardəşone, bə şəhidon ruhi və bo məhbuson azadi ro dıvo kardışone. Məclisi orəxədə ehsan doəşone.

  De ım munasibəti Ərdəbil və Zəncan şəhəronədən mərasimon dəvuniə bıən. Ərdəbilədə təşkil bıə məclisədə hoccətul-islam Nuri İroni devləti diplomatik vəsilonku piəşe ki, Az.R -ədə imom Museyi Kazem (ə) roy dəvom kardə islami məhbuson azadi roədə foydəmandə qəmon şodo.

İraği Kazimeyn şəhəri İmomon hərəmi rəhbəriyyəti elan kardəşe ki, ımsor  imom Museyi Kazem (ə) şəhadəti sorəqardışi rujonədə çey hərəmi ziyarət karde ro omə zəvvaron miğdar 5 milyon 600 həzo nəfərisən dəvardə. Imsornə piyodə şemonədə çe Turkiyə İrağədə səfir Fatih Yıldıziən iştirak kardəşe.