Natə estakada rıjie səbəb çiçe

Dekabri 15-minə ruji Kaspi dıyoədə natə estakadə rıjie səbəbiku 10 nəfər natəvonə koəkon həlok bıən. Çəvonədə 1 nəfəri meyt peydo kardəşone. Əmandənə 9 nəfəri peydo karde ro xilaskardə ğıvvon çand rujnə səyi hələ ki, nəticə doəş ni.

Respublika Sər Prokurotura de ım ğəzo əlağədar cinayətə ko oj kardəşe, təhğiğat bardedə.

"Politika.az" sayt nıvıştedə ki, ım estakada 1970 -minə sori inşa bıə, tosə ısət hiç əsasinə təmir kardəşon nı. Devləti rəhbəri bə SOCAR-i dəstur doəşbe ki, Soveti vaxtnə estakadon əsasinə təmir bıko. Im sori tovıstonədə Pespublika Hatə Şirkəti rəhbəri bə  Prezidenti hesabat doəşbe ki, ım estakadon təmir bıən, natəvonon əminiyyəti təmin karde ro har tədbiron vində bıə.

İsət məlum bedə ki, ım rıjiə estakadadə kosmetik təmir bardəşonebən. Natəvonon Həmkarə İttifaği sədr Mirvari Ğəhrəmanlı votəşe ki, rıjiə estakada ğəzoninə vəziyyətədə be vey vaxtbe ki, məlumbe.

Jıqo vəziyyətədə Milləti vəkil Fazil Mıstəfo Natə Şirkəti rəhbəriyyətış müdafiə kardə. Əv ponə sori Kasipi dıyo "Qunəşli" natə platformadə otəşsuzi nəticədə 30 nəfər həlak beədən bə ım Şirkəti rəhbəriyyəti mevğe tərəfdar beşəbe. Co qılə Millətə vəkil Ğodrət Həsənğoliyev ıştə həmkar Mıstəfosə tikiən bə nav şə, Parlamenti iclasədə votəşe ki, ım ğəzo xarici ğıvvon təxribati nəticə be bəzne. Azərbaycan müstəğilə siyasət bardedə, bə qorə mümküne ki, ım siyasətiku norozi mandə devləton tərəfo estakadon zədəjə bıbo.

Tolış bımədə votedə "Hüseyn, Hüseyn do pevatedə, ımon xəbə sedən məhərrəmə manqi çande?" Respublika cəmiyyət həmə ım estakada ğəzoninə vəziyyətiku, bo əsasinə təmiri ro co bıə pulon dələmurd kardeku cər jedən, Həsənğoliyev və çey həmtoyfə Mıstəfo bo milləti ne, boştə toyfə vəzufədarə odəmi vəkiləti kardedən.