Apellyasiya Məhkəmə Hacı Zulfiğar Mikayılzadə cəzo həniən qon kardəşe

Boku Apellyasiya məhkəmə Hacı Zulfiğar Mikayılzadə və çey həmməsləkon şikayəti dair ıştə ğəror elan kardəşe. Çe navonə məhkəmə 11 nəfəri barədə bekardə hokum ğıvvədə oqətəşe, Hacı Zulfiğari isə 17 sornə zindonə cəzo kəşə şərait həniən qon kardəşe.

İminə instansiya məhkəmə hukmədə əv ım cəzo ciddi rejiminə zindonxonədə kəşənin bıe. Apellyasiya məhkəmə əv de əlahiddə rejiminə muəssisə əvəz kardışe.

Mikayılzadə vəkil Şəhla Humbətova bə Azadi Radio votəşe ki, prokurori və ya zərərdidə tərəfi apelyasiya şikayət nıbə şəraitədə çe muttəhimi cəzo qon karde əbıni. Hacı Zulfiğari barədə jıqo şikayəti nıbe səbəbiku Apelyasiya məhkəmə ım ğərar ğeyri-ğanunie, əv bı barədə bə Ali Məhkəmə kasassiya ğaydədə şikayət bəkarde.

"Mısılmonon İbemonə hərəkati" sədr Hacı Taleh Bağırzadən apreli 16-ədə bə Apelyasiya məhkəmə vardəşone. İyo çey cəzo muddəti səpe 5 manqən əlavə karde barədə bə şikayəti diə kardedən. Hacı Taleh məhkəmədə votəşe ki, "bə çımı koy bəpe Prezidenti Adminstrasiyadə de İlham Əliyevi sədarəti diə kardə bıbo. Çey çəp-rosədən bəpe Əli Həsənov, Fuad Əliəsgərov bınışton. İclasi katib Ramiz Mehdiyev, prokurorən Zakir Qaralov bənine. Çunki mınşon şəxsən de İlham Əliyevi sifarişi bə zindon dənoə."

Vəkil Fariz Namazlı məhkəmə vədə çand qılə vəsadət ros kardəşe, əmo hakimi ımon təmin kardəş ni.

Məhkəmə nubətinə iclas apreli 23-ədə dəbəvarde.