İ. Əliyevi ğəssəm hardə mərasim dəvarde

Aprelə manqi 18-minə ruji, Milli Məclisədə Azərbaycanə Respublika prezident Ilham Əliyevi ğəssəm hardə mərasim dəvarde. "Bakupost" sayt xəbə dodə ki, ım mərasimədə Konstitusiya Məhkəmə hakimon, Pespublika hokuməti rəsmiyon, Parlamenti deputaton və prezidenti ailə uzvon iştirak kardəşone.

Konstitusiya Məhkəmə sədr Fərhad Abdullayevi ıştə nitğədə votəşe ki, Konstitusiya Məhkəmə bə 11 aprel prezidentə entexabati nəticon əsasən İlham Heydəri zoə Əliyev çe Azərbaycanə Respublika prezident elan kardəşe. Bə Respublika Konstitusiya 103-minə maddə əsasən de Konstitusiya Məhkəmə hakimon iştirki əv bo ğəssəm harde dəvət bıe.

İlham Əliyevi sıftə ıştə dast çe Az.R Konstitusiya səpe noşe, ğəssəm hardışe ki, bə Konstitusiya əməl, bə xalqi layığinə xidmət bəkarde. Çəyo ıştə rosə dast Gıroni-Kərimi səpe noşe votışe ki, " ıştə dasti Ğıroni- Şərifi səpe nodəm, ğəssəm hardedəm ki, bə Azərbaycani xalqi əsron dırozi ofəyə milli mənəvi molyəton və ənənon sadiğ bəmandem, əvoni həmişə barz bəqətem".

Çəyo prezident Əliyevi ıştə 15 sornə prezidentəti fəaliyyəti barədə tarifinə nitğ ehandəşe. Müxalifət tənğid kardəşe, votəşe ki, əvon antimilli xəyanətkar marqinalonin, bə ıştə dövləti əleyh beşedən, çəvon vırə çe tarixi  xəşəlxonədəy.

Bə 2016-minə sori dəvardə Referendumi əsasən ısət Az.R-ədə prezidentəti muddət bə 7 sor ros kardə bıə. Əqər Xıdo mehlət bıdo, İlham tosə 2025-minə sori ım devləti idarə karde imkanədə bəbe.