Ğazax rayoni polis şebə rəis məçitədə əzon doe ğədəğən kardəşe

Ğazax şəhəri sakin Mircəfər Huseynzadə bə "Hədəf14.az" sayti muraciət kardəşe ki, Ğazax rayoni polis şebə rəis Ədalət Əliyev bə İmom Zaman (ə) məçiti koy mane bedə, tələb kardedə ki, məçitədə əzon doə nıbo.

Huseynzadə bə sayti muxbiri votəşe, İmom Zaman (ə) məçit şəhəri Əhməd Seyidov kuçə 46 unvanədə məskune. Tam ğanuni fəaliyyət nişon dodə. Həmə sənədonən ıştə ğaydədey. Rayoni polis şebə rəis çeyku tələb kardedə ki, məçitədə əzon doe dəparçıno. Çimi səbəbi izah kardedəni. Məçiti ğırbonqahədə Həzrəti Əli (ə) ğılınc - Zulfiğar ehaştə bıə. Tələb kardedə ki, eyən çəğono peqətəmon. Əv ıştən de rayoni icra sərdari muavini, rayoni prokuror və bələdiyyə sədri bahəm omin mıku tələb kardışone ki, əqər çəvon tələbon icra nıkom, mıni dəstqir bəkarden, dəbənon bə zindon. Məçiti qımbətədə xıdo nominə nıvıştəy hestbe. Bələdiyyə sədri əv doşe oçınie.

Mircəfər Huseynzadə həmən ğeyd kardəşe ki, Ədalət Əliyev  jıqo zınedə ki, az İronədə təhsil səme. Hərçənd ki, ım jıqo ni. Az bə İmom Xomeyni ağa təğlid kardedəm. Əv bı səbəb mıni təhğir kardedə, bəmı çe İroni aqent votedə. Bə şion təzyiğ kardedən, əmo vəhabion məçit, nurçion məktəb şəhərədə bemaneə fəaliyyət nişon dodə. Əmə bə devləti ğanunon əleyh hiç qıley ğeyri-ğanuni əməli soyb nimon. Pidəmone ki, hokuməti məmuron çəmə fəaliyyəti məhdud karde səbəbi barədə bə əmə rəsmi məlumat bıdon.