Milli Məclisi Az.R tojə Sər nazir təsdiğ kardışe
Apreli 21-minə ruji MM plenar iclas dəvunişe. Bə prezident İlham Əliyevi təğdimati əsasən Novruz Məmmədovi Az.R Sər nazir təyin bıe təsdiğ kardışe.
Novruz Məmmədovi 71 sınn hestışe. Əv 1947-minə sori Naxçıvani Babək rayoni Şıxmahmud diədə çe moəo bıə. 1997-minə soriku Prezidentə Adminstrasiya Xariciə Əlağon şebə mudir bıe.
Əliyevi Naziron Kabineti strukturədə bəzi əvəzon barədən sərəncom doəşe. Standartə, Metroloqiya və Patentə Devlətə Komitə ləğv, Muəllifə huğuğon Aqentiyyət de Patent və Əmtəə nışonon Mərkəzi ilhağ kardəşe.
Çimi muğabilədə Antiinhisar və bə İstehlakə vıjori nəzarətə Devlətə Aqentiyyət soxtəşe. Mədəniyyət və Turizmə Vəzarət bə 2 vırə - Mədəniyyətə Vəzarət, iyən Devlətə Turizmə Aqentiyyət poə kardəşe. Meydan TV bə cəmiyyəti yod vardedə ki, tosə 2006-minə sori Mədəniyyət Vəzarət çe Turizmə Vəzarətiku co bıe. İ.Əliyevi həmonə sori ım 2 qılə vəzarət de bə yəndı onoe roy i kardəşbe. İsət əvon sənibəton co kardışe.
İğtisadşunas Ğubad İbadoğlu bə "Azadlıq.info" votəşe ki, ım curə epizodik əvəzon cəmiyyətədə islahaton şe barədə imitasiya təsəvvuron bə əməl vardedə. Məsələn, Antiinhisarə Devlətə Aqentiyyəti soxte bə nav, Parlament "Rəğabəti həxədə Məcəllə" ğəbul kardəninbe. İm məcəllə layihə 2010-minə soriku MM-ədəy, tosə ısət ey bə muzakirə vadodənin. Be ım ğanuni Antiinhisarə Komitə fəaliyyət formal bəbe. Im cuzi əvəzonən iğtisadiyyatədə bə əsasinə qardışi səbəb bıe nibəzne.
