Əliyevi Naziron Kabinetədə kom əvəzon kardışe

Apreli 21-minə ruji Prezident İlham Əliyevi Naziron Kabineti tərkib elan kardışe. Bə siyahiədə 12 qılə nazir, 2 qılə devlətə komitə, 3 qılə devlətə xidməti sədron vəzifə təsdiğ bedə. Hərçənd ki, Az.R hokuməti tərkib 19 qılə nazirat, 8 qılə devlətə komitə, 8 qılə devlətə xidmət, 2 qılə devlətə aqentiyyət və həniən diqər təsisatono ibarəte.

Prezidentə entexabaton ərəfədə Əliyevi tərəfdaron təbliğat bardedəbin ki, prezident, vıjniəyon bəpeşt əsasinə islahaton bəbarde. Əmo ey tojə sər naziri təsdiğ kardə sənədədə i qılə tojə nazirat soxtışe, qıley devlətə komitə ləğv kardışe. Yəni bə jıqo cuzi əvəzon hiçən islahat nom noe əbıni. Isət Prezidenti 21 aprel sərəncamədə 7 qılə naziri, 6 qılə devlətə komitə , 5 qılə devlətə xidməti sədron təsdiğ nıbe, siyasi təhlilğəronədə kali kəsonku bə islahaton rəvoc doe qımoni bə əməl vardedə.

Əliyevon həmonə siyahiədə bənə Təhsil, Səhiyyə, Ekoloqiya, Mudafiə Sənaye muhummə sahə naziron nomon nıbe oşko nişon dodə ki, bə ım vəzifəon təyinat bə ğeyri-muəyyən səbəbon qorə Prezidenti bo peşonə vaxton oqətəşe. Yəni bı koədən bə islahaton, hokuməti vəsilonədə ixtisaron barde umu xeyli kame.

Azadi Radio xəbə dodə ki, Boku şəhəri mer Hacibala Abutalıbov Sər Naziri muavin, ASAN xidməti sədr İnam Kərimov Di Təsərrufati nazir təyin bıə bəpeşt çəvon kanə vəzifə tey mandə. Təhsil Vəzarətən çand manqe ki, be nazir ko kardedə.  Hokuməti vəsilonədə ım curə vəziyyət cəmiyyətədə bə jıqo qıley nəzəri səbəb bedə ki, Naziron Kabineti umumən devləti usul -idarə sistemədə anəhoyən rol nişe. Ey bıno-pe ixtisar karde vaxt omə rəsə.  Çunki devlət tamam çe Prezidenti Adminstrasiya tərəfo idarə bedə.