Bokuədə "Formula 1" musabiğə əndişəon
Apreli 27-ku tosə 29-i Bokuədə "Formula 1" musabiğə dəbəvarde. De ım tədbiri əlağədar şəhəri mərkəzi İçərişəhər, Azneft, Azadi meydoni ətrofə kuçon çe apreli 23-minə rujiku dəbastəşone. Im vəziyyət tosə mayə manqi 1-minə ruji dəvom bəkarde.
Şəhəri mərkəzi kuşəon de betonə pliton və osınə setkə bə əhatə se bo ım məhəllon əhali xeyli işkilon bə əməl vardəşe. "Maide.az" bə "Contact.az" sayti əsasən nıvıştedə ki, çand qılə nəğliyyatə marşruton əvəz karde, avtobusə istqahon dəbaste, bey səbəb bedə ki, əhali bəştə koə vırə və mənzilon rəse ro 2 kilometr məsafə piyodə şənin bedən. Lekbatan, Bayıl məntəğə sakinon jimon lap bə blokada şərait peqardə. Im ərazi çand qılə məktəbonədə dərson tosə apreli 30 - minə ruji dəparçıniəşone.
Jıqo "Qran-pri" musabiğaton çe dınyo bənə Yolə Britaniya, Braziliya, Belçika, AİŞ, Çin, Bəhreyn və s. məmləkətonədən dəvardə. Əmo əyo hiç vaxt əvşon şəhəri mərkəzi kuconədə dəvuniəni, demiən ıştə şəhrıvandon bə anədə məşəğğəton dıço kardəşonni. Almaniya və Britaniya hokuməton isə bə budcə ziyan varde qorə ım keşi dəvunieku imtina kardəşone.
Im musabiğə Bokuədə dəvunie bə devləti budcən jə foydəş bedəni. Vərzeşə vəzir Azad Rəhimovi votəşe ki, ım tədbiriku mədaxili iqlə bə bilet həvate hisob bə dast vardedəmon. Çunki çey reklamə huğuğ tamam bə "Formula 1" soybon məxsuse. Ey həmən ğeyd kardəşe ki, ım tədbiri bəpeştə 3 manqi muddətədə əmə ım muğavilə tosə 2025-minə sori dıroz karde barədə ıştə ğərori bə təşkilatə komitə votəninimon. Əmo muğavilə ısətnə şərton bo çəmə tərəfi vey qone, bı səbəbən ey əvəz karde lozime.
Hokumət ımsornə tədbiri xarcon miğdari barədə məlumat dodəni. Əmo iqlə ım məlume ki, 2016-minə sori "Formula 1" keşi dəvunie bo devləti budcə bə 150 milyon mənot bə sə oməbe.
