AŞPA Əliyevi hokuməti korrupsiya əməlon ifşa kardışe

2017 - minə sori yanvari 27-ədə Avropa Şura Parlamentə Assambleya çey deputaton arədə rışvəxorəti fakton tədğiği barədə ğəror ğəbul kardəşbe. Mayə manqədə de ım məsələ əlağədar istintağə qrup təşkil bıe. Bı rujonədə, yəni apreli 26-ədə AŞPA deputaton plenar iclasədə ım istintağə qrupi 219 səhifəninə hesabat muzakirə kardışe.

Muzakironədə bokujə deputat Səməd Seyidovi votışe ki,  "çımı məmləkəti bənə rışvəxori bə ğələm doe, ıştən qıley korrupsiyay". Digər deputat Sahibə Ğafarova isə bə ım məruzə  bənə Avropa tərəfi bə Azərbaycani pəxiləti karde ğıymət doşe. Az.R deputaton de ciddi-cəhdi bımi etirazi nəticə nıdoşe. Həni hiç kəsi bə Əliyevon hokuməti tərəfdarə fikir nıvotışe, çey numayəndon bı iclasədə tam təcridə vəziyyətədə mandən. 125 nəfər avropavojə deputatonədə 123 kəsi bə ım hesabati ğəbul bıe sədo doşone.

Hesabati muzakironədə məlum bıe ki, Avropa Şura 17 nəfər məmur de Boku hokuməti korrupsiya əlağonədə bıən, çəvonku pul və muxtəlifə hədiyyon səşone. Çimi nəticən əv bıə ki, əvon bı Respublikadə bə entexabaton pozitiv ğıymət doəşone, hokuməti ğanuni darıştə, bə siyasi fəalon divon qətə fakton bə ğeyd sə nişone.

Hesabatədə azərbaycanıjə deputaton - Səməd Seyidov, Elxan Məmmədov, Muslum Məmmədov və həniən diqəron korrupsiya əməlonədə iştiraki barədə konkret fakton hestin. De Almaniya, Belçika, Norveç, İspaniya, İtaliya, Finlandiya, İsveçi deputaton korrupsiya əlağədə çəvon nomon təsrif bıedə.

Muxalifəti lideron Avropa Şura ım hesabati ğəbul karde Boku hokuməti dınyo miğyasədə beabur bıe hisob kardışone.