Polisi qıley dini fəalşən dəstqir karde
Aprelə manqi 26-ədə de Mutəşəkkilə Cinayəton Mubarizə İdarə ki, xalqi arədə bey "Bandotdel" votedən, ım idarə həmkaron Cəlilabadi məçitədə dini fəal Şamxal Eyvazov nomoj votə vırədə dəstqir kardəşone, də vonə ki, quya çey səpe 1 kilo 277 ğrəm tıyok peydo kardəşone.
Cey ailə uzvon bə Meydan TV məlumat doəşone ki, Şamxal Ğum şəhərədə təhsil sedə. Marti 16-ədə de Nəvuzə idi əlağədar bə vətən omeədə Hostoro sərhədə məntəğədə polison əv qətəşone, bardəşone bə Boku, 4 ruji bədiqə vadoəşone, əmo bey çe Respublikaku bə kəno beşe ğədəğən kardəşone. Çimi səbəbi və muddəti barədə bəvon doə parsi votedəbin ki, ım ğədəğən muvəğğətie. İsət məlum bedə ki, bo ey cinayətə ko hozo kardedənbən. Çey pıə Arzu Eyvazov votedə ki, əvon xeyzonumjənə 2007-minə soriku İronədə jimon kardedən. Har sor ıştə əvlodon vinde ro bə vətən əvoyn. Hic vaxt de hokuməti orğanon problemşon bıə ni. Im cinayətə ko soxtə, şər və bıhone. Çey nəzər jıqoe ki, Şamxalşon bə çəvon muxalifətə əvlodon qorə bə zindon dənoə.
"Arannevvs.com" Arzu Eyvazovi bə Az.R prezident Əliyevi muraciət karde barədə xəbə doəşe.
Şamxal həmən "Sizinyol.com" sayti muxbire. De çey dəstqir bıe əlağədar ım sayti bə Respublika muvafiğ orqanon muraciət vığandəşe ki, cey huğuğon bərpa kardə bıbo.
