Yevlax rayoni İcra hakimiyyəti Aran ğəsəbə məçit rıjniəşe

Yevlax rayoni Aran ğəsəbə 3 qılə diyo ibarəte. Bı dionədə məçit nıbe. 1992-minə sori ım ğəsəbə odəmon bə ğərar omin ki, bəştə vəsaiti və bə ianon hisob qıley məçit inşa bıkon.

Bımi icazə doe ro de lazımi sənədon bə rayoni İcra hakimiyyəti  muraciət kardışone. İcazə sə bəpeştə, ğəsəbə cəmiyyəti tədricən de pul qırd karde roy, hissə-hissə məçiti inşa bə orəx rosniəşone. Çimi bəpeşt İcra hakimiyyəti tələb kardəşe ki, ım məçit bəpe oçıniə bıbo. "İslamın səsi" nıvıştedə ki, əvon ım tələbi dey izah kardedən ki, quya bı məçitədə vəhabion ibadət kardedən. Ğəsəbə əhali ım iddia təkzib kardedə, votedə ki, əvon Peyğəmbər (s.ə.v.s) və Əhli-Beyt (ə) tərəfdarə imoninə odəmonin. 2 manq çimi bə nav de hokuməti numayəndəon iştiraki qonə texinka vardəşone, ım məçit rıjniəşone. Dəvardə rujonədə hokuməti ım vandalə hərəkəti video kəşemon "Yutub"ədə pevolo bıə.

Əliyevi məmuron həmən bə imon əhli divon qətə əməlon dəvon hestışe. Amerika Devlətə Departamenti Az.R -ədə bə məhbuson işqəncə doe ğeyd, huğuğə mudafiəkar Arzu Abdullayevan Respublika zindonxonəonədə jiqo fakton mevcud bıe təsdiğ, əmo Penitensiar Xidməti sıxanəvoti isə ım iddia təkzib kardəşe, MM deputat Hikmət Məmmədovi hətto votəşe ki, imon həmə bıhtonin.

Jıqo qıley vəziyyətədə huğuğə mudafiəkar Oqtay Quləliyevi dini məhbus Abbas Huseynovi Ğobustani zindonxonədə ijən bə şiddətinə işqəncon məruz mande xəbə doşe. Abbasi moə Rəhimə xanımiən ım fakt təsdiğ kardışe. Votışe ki, zindonxonə rəisi muavinən daxil 4-5 nəfər əvşon kuə, çəyo dənoəşone bə karser. Çimi səbəbən əv bıə ki, Abbasi Əli Kərimli təvəlludə ruj təbrik kardəşe.

Penitensiar Xidməti bı səfən bə Abbas Huseynovi munasibətədə jıqo ğeyri-ğanuniə həvəşiə hərəkəti barədə fakton təkzib kardışe.