AİP de Şamxal Eyvazovi dəstqir karde əlağədar bəyanat doşe

Ğum təhsilə muəssisə tələbə Şamxal Eyvazovi de soxtə ittihami bə zindon dənoe, Az.R ictimaiyyətədə bə etirazi səbəb bıə. Az. İslamə Partiya hokuməti ım hərəkət ğərəzin, bə Eyvazovi əleyh bə nav doə ittiham soxtə və bıhton hisob kardəşe.

Şamxali pıə Arzu Eyvazovi de ım dəstqiri əlağədar bə Respublika ictimaiyyəti muraciətən votəşe ki, "bə mominə odəmi de nəşə ticarəti nomi şər ğandəkəson ey kışteyən bəzınen. Xıdo roədə jıqo şəhadət bə har kəsi ğısmət bedəni. Əqər şəhadətə xəbə bo, bəmı "Xıdo səbr bıdo" məvotiyon, "ım şəhadət mubarək bıbo" bıvotiyon.

Bə dini məhbus Abbas Huseynovi zindonxonədə fiziki cəzo doe faktən çe Respublika cəmiyyəti nəzərədəy. Şəhrıvandə cəmiyyəti Koəkə Orupi 8 nəfər uzvi bə Respublka hokuməti və ğeyri-hokumətə təşkilaton muraciətən bəyonət pevolo kardəşone ki, bə məhbuson işqəncə doe fakton xeyli veyin, hokumət əvoni tədğiğ kardedəni, bə jıqo hərəkəton həniən rəvoc dodə.

Muraciəti muəllifon devləti orğanon vədə tələb nodəşone ki, çəvon de A. Huseynovi vindemoni təmin bıko. Əqər bımi icazə nıdo, demiən Respublika zindonxononədə bə məhbuson işqəncə doe fakton təsdığ bəbe.

Abbas Huseynovi moə Rəhimə Huseynova bə Azadi Radio qəp jəşe ki, əv apreli 30 -ədə bə Penitisiar Xidməti Əməliyyat rejimi idarə şə, əmo əyo əv ğəbul kardəşon ni. Mayə manqi 1-ədə bə Ombudsmanə Aparati, həmən bə Beynəlxalqə Səlibe Sorxi Boku numayəndəti şə. Səlibe Sorxi həmkar Yevqeni Korotkeviçi sıxan doəşe ki, çəvon numayəndə nezə rujonədə bə Ğobustani zindonxonə bəşe və de Abbasi şəxsən vindemon bəkarde.

Çimi bə navən bə Abbasi işqəncə doəşon bıe. Vəkil Yalçın İmanovi ım fakt bə cəmiyyəti rosnie səbəbiku hokuməti əv ce Vəkilon Kolleqiyaku beğandəşbe.