3 May Umumdınyo Ozodə Mətbuati Ruje
Mayə manqi 3-minə ruj Umumdınyo Ozodə Mətbuati Ruje 1993-minə sori İbə Milləton Təşkilati Sər Assambleya ım ğəror ğəbul kardeədə bəyon kardışe ki, azad pluralist mətbuat demokratikə cəmiyyəti muhummə əloməte, həmən Bəşəri Huğuğon barədə Bəyonnomə əsasə müddəaonədə qıleye.
De ım ruji munasibəti İMT sər katib Antoniu Quterrişi votəşe ki, KİV -on bə dınyo və bə har devləti problemon ruşnə eğandedən, əvoni həll karde roədə əvəznıbə xidməton nişon dodən. Bə jurnaliston munasibətədə cinayətə hərəkət kardəkəson de ğanuni bəpe bəştə cəzo bırəson.
"Freedom House" beynəlxalqə huğuğə mudafiə təşkilati 2017-minə sori dınyoədə mətbuatə azadi vəziyyəti dair reytinğədə bə Az.R ım azadi ən vey darıştə orəxnə 10 qılə devləton restədə vırə doəşe. Ğeyd kardəşe ki, ım devlətonədə hokumət sayton blok kardedə, bə sosial şəbəkə fəalon təzyiğ nişon dodə, jurnaliston bə zindon şododə, əvoni təğib kardedə.
Az.R dəstqir kardə jurnalist və bloqeron miğdarədən həmonə 10 qılə məmləkəton restədəy. Bə ımsori yanvarə manqi məlumati əsasən Boku hokuməti 12 nəfər ım peşə fəalon bə zindon dənoəşe.
Ponə sori "Besərhədə reportyoron" beynəlxalqə jurnaliston təşkilati elan kardə "Dınyo mətbuatə azadi indeks"ədə Az.R 163-minə vırədə ğəror qətəşe. Cənubi Ğəfğazi diqər devləton - Ermənistan 80, Qurciston isə 61-minə məğamədə mandedən.
