MM-i deputaton ıştə məvacibon ziyod kardışone

Mayə manqi 4-ədə Milli Məclisədə deputaton, Ombudsmani, Komstitusiya Məhkəmə, həmən diqər məhkəmə hakimon məvacibon ziyod karde məsələ muzakirə kardışone.

Deputat Ğodrət Həsənğuliyevi votışe ki, Prezidenti Adminstrasiya koəkon barzə məvaçib sedən. Çəvrey şebə mudir çe Milli Məclisi sədrisən vey zəhmət həx sedə, təklif kardışe ki, Parlamenti sədri məvacib bə 10 həzo, deputatonki isə bə 8 həzo mənot ros kardə bıbo. Əmo ım layihə muzakirədə ki, çe Prezidenti tərəfo bə Parlament vığandə biə və əyo ım səlahiyyətinə vəzifədaron manqə məvacibi 10% ziyod karde nəzərədə qətə bedəbe, deputaton bə Həsənğuliyevi təklifi tərəfdar benışin, ım layihə təsdiğ kardışone. Çimi bəpeşt MM sədr 2475 mənot, çey iminə muavin 2227, muavin 2103, komitə sədron 1980, deputaton isə 1732 mənot məvacib bəsen. Bəvon ıştə səlahiyyəti icra karde roədə har manq əlavə həmonə məvacibi 50% - i ğədərən təminatə pul bədon. Əvon har sor bə məzuniyyət beşeədə ıştə manqə məvacibi 2 misli ğədərən istirahətə pul bəsen.

Az.R Bəşəri Huğuğon Muvəkkili - yəni Ombudsmani məvacib 2025 mənotiku bə 2230 mənot ros kardışone. Çey məzuniyyəti təminat 4460 mənot bəbe.

Konstitusiya Məhkəmə, Ali Məhkəmə sədr və hakimon məvacibonən təğribən çe MM rəhbəriyyət və komitə sədron zəhmət həxi ğədərədə bəbe.

Im əvəzon çe mayə manqi 1-ku tətbiğ bəkarden.

Əlavən vote lozime ki, Az.R-ədə miyonə manqə məvacib rəsmən 550, minimum məvacib isə 130 mənote. Boku hokumət 2001-minə sori bə Avropa Şura uzv beədə nezə soronədə minimum məvacibi bə miyonə manqə məvacibi 60% -i hədd rosnie bəştə səpe təəhhud peqətəşbe. Əmo cey bardə sosial siyasət ım fərği sorbəsor həniən vey kardedə. Haliyədə minimum zəhmətə həx miyonə məvcibi 23%-i ğədəre.