Avropa Məhkəmə "Nardarani" məhbuson şikayəti təhğiğat bino kardəşe
Avropa Bəşəri Huğuğon Məhkəmə bə Az.R 14 nəfər məhbusi şikayəti dair kommunikasya bino kardəşe. Çəvonədə 9 kəs - Taleh Bağırzadə, Abbas Huseynov, Zakir Mustafayev, Şamil Abdullayev, Əlibaba Vəliyev, Rasim Cəbrayılov, Ramin Yarıyev, Abbas Ğuliyev və Əli Nuriyev "Nardarani faciə" məhbusonin. Əvon polisi tərəfo bə işqəncon və ğeyri - insoniə əməlon məruz mande barədə şikayəton Az.R huğuğə muhafizə orğanon tərəfo tədğığ nıkardeku şikayət kardəşone.
Vəkil Fariz Namazlı bə Meydan TV votəşe ki, Bəşəri Huğuğon Məhkəmə de ım şikayəton əlağədar bə Boku hokuməti parseş vığandəşe.
Boku Apelyasiya Məhkəmədə dini fəal, "Mısılmonon İbemonə Hərəkati" uzv Əhsən Nuruzadə şikayəti dair məhkəmə proses bino bıə. Çey vəkili iminə instansiya məhkəmədə mudafiə tərəfi xeyli şikayət və fakton təhğiğ nıbe, həmən diqər huğuği darıştəyon barədə vəsadət ros kardəşe, əmo hakimi bəştə adəti muvafiğ ım vəsadətonədə hiç qılə təmin kardəş ni. Mayə manqi 23-ədə məhkəmə işlas dəvom bəkarde.
Məhbusə Ailon Koordinasiya Mərkəz və Ruşinəfikron İbemon təşkilaton de "Siyasi məhbuson mualicə bıkən" şuari qıley aksiya təşkil kardəşone. Im aksiya fəalonədə qıley jurnalist Əvəz Zeynallı votəşe ki, zindonxononədə məhbuson vəziyyət vey qone. Çəvon təşkil kardə təşəbbus qrupi uzvon de bə mualicə ehtiyacış bıə siyasi məhbuson vindemon bəkarden, de ımi əlağədar çe Penitensiar Xidməti vədə tələbon bə nav bədon.
Penitensiar Xidməti de ictimaiyyəti əlağə şebə sərdar Mehman Sadıqovi de Azadi Radio vasitə zindonxononədə məhbuson mualicədə problemon barədə xəbə təkzib kardəşe, votəşe ki, həkimon bə mualicə ehtiyacış bıə məhbuson vaxtədə tibbi komək nişon dodən.
