Bank sistemədə behran dəvom kardedə

Bank sistem har qıley devləti iğtisadiyyati əsasə vəsilonədə qıleye. Im sistemış salem nıbə məmləkəti iğtisadi inkişafədə xeyli mışğılon bə meydon beşedən ki, ımən bə behrani səbəb bedə.

Çe Az.R iğtisadi jimonədə behrani tosə ısət dəvom karde səbəbonədə qıleyən bank sistemi salem karde mumkun nıbeyədəy. Hərçənd ki, bankon çe behraniku bekarde ro, çe devləti budcə, həmən çe SOKAR-i natə fondiku xeyli milyard məbləğədə  mənot və dollar bə bankon avjor kardışone. Əmo im sistemi behrani hələən dəvom hestışe.

"Azadlıq.info" sayti bə Maliyyə Vıjoron Nəzarətə Palata Respublika bankon bə ım sornə yanvar - martə manqon fəaliyyəti dair stasistik rəğəmon dərc kardəşe. De ım məlumaton oşko bedə ki, bə ponə sori sıftənə 3 manqi nisbətədə ımsornə 3 manqədə bankon mənfəət har sahədə umumən 272 milyon mənot bə kam bıə. Haliyədə məmləkətədə 30 qılə bank fəaliyyətədəy. Çəvon 7 qılə de ziyani ko kardedə. Im bankon ziyani cəmi məbləği əmandənə 23 qılə bankon mənfəət ekıştəşe. Məsələn, VTB Azərbaycan banki ımsornə 3 manqi ziyan 247 milyon mənot bıə. Nəzarətə Palata ımiən ğeyd kardedə ki, de musbətə saldo ko kardə həmonə 23 qılə bankon mənfəətən bə ponə sori nisbətədə xeyli bə kam bıə. Imən keşvəri iğtisadiyyatədə behrani dəvom karde əlamətonədəy.  Çimi səbəb həmən əve ki, əhali arədə bə bankon bovə şe-şe saru eqınidə. Yanvarədə bə dekabrə manqi nisbətədə bankonədə əhali əmonəton məbləğ 60 milyon mənot kam bıe, həmən şəhrıvandon jimoni səviyyə bə ji eqınie nişon dodə.