Az.R de İroni sərhədi 3 qılə məntəğə bə 24 saatinə rejim ovaşte

Az.R de İİR arədə marzi bəzi ovaştə məntəğon daima izdihamin bıe əyo xeyli mışğılon bə əməl vardedəbe. Im problemon barədə KİV xeyli tənğidi məğalə nıvıştışone, sosial şəbəkonədə yuzeron çanədə video rolikon numayiş kardışone.

Axır ki, bə əhali ım məşəğğəton orəx doe ro ım 2 qılə devləti rəsmiyon 2018-minə sori martə manqi 12-14-minə rujonədə məşvərət dəvunişone, bə ğəror omin ki, İİR de Az.R arədə marzi  3 qılə məntəğə bə 24 saatinə koə rejim ovaşto.

"Sputnik.az" sayt xəbə dodə ki, Hostoro Kemrukə İdarədə Az.R və İİR sərhəd və kemruqə orğanon rəsmiyon mayə manqi 10 -də vindemon dəvunişone. Hostoro, Biləsuvar və Culfa sərhəd  məntəğon həmonə rujiku bə 24 saatinə koə rejim ovaşte barədə 2 qılə devləti arədə ğəbul bıə həmonə martə manqi ğərori icra karde barədə muzakiron bardışone. Ğeyd kardışone ki, 2 qılə devləti arədə iğtisadi, mədəni, turizmə əlağon, həmən əmtəə munasibəton surətinə inkişaf, sərhədə məntəğon fəaliyyəti təkmil və sodə karde zərurəti bə miyon vardedə. Hostoro sərhəd ovaştə məntəğə 24 saatinə rejimədə ko karde həmən Şimal-Cənubə beynəlxalğə nəğliyyatə dəhlizi bərğəror beədə əhəmiyyətinə rolış bəbe.

Im vindemonədə Az.R tərəfo Devlətə Sərhədə Xidməti polkovnik-leytenant Azad Abdullayev, İİR tərəfo sərhəd xidməti rəsmi numayəndə Nozər Muradi bə muvafiğ sənədon ğol kəşeşone. Bı mərasimədə Az.R Devlətə Sərhədə Xidməti Aparati sərdar general - mayor Elçin İbrahimonvi, Devlətə Kemruqə nəzarətə idarə rəis Cavad Ğasımoviən iştirakşon bıə.