Az.R zindononədə bə dini məhbuson işqəncə doe dəvom kardedə

Az.R zindononədə de məhbuson ğeyri-insonə rəftor, bəvon işqəncəon doe barədə nəinki Respublika KİV-on və huğuğə mudafiəkaron, həmən beynəlxalqə təşkilati numayəndon çand bəjəm bəyonaton doəşone, Boku hokumətşon dəvət kardə ki, bə ım əməlon orəx bıdo.

Mayə manqi 7-minə ruji Bokuədə Avropa İttifaği de Ozorboyconi Parlamenti Həmkarəti Komitə iclasədə Avropa Parlamenti vitse-prezident Heydi Hautala ım faktonku ıştə norohəti məxsusi ğeyd kardışe, votışe ki, əqər bə əleydə fikrinə insonon munasibətədə tolerantəti nibu, jəqo şımə votə tolerantəti niməncule.

Əmo ım qıley ocizanə fakte ki, hətto çand qılə beynəlxalqə nufuzinə təşkilaton bə Əliyevi hokuməti kardə muraciəton çey məmuron quşələxə kardedən. Respublika zindonxononədə bə məhbuson, məxsusən bə dini məhbuson munasibətədə ğeyri-ğanuniə, ğeyri-insonə, işqəncə əməlon hələən dəvom hestışe.

Dini məhbus Abbas Huseynovi moə Rəhimə Huseynova bə Meydan TV bə Abbasi qonə işqəncəon doe həxədə məlumat doəşe, votəşe ki, devləti hiç qıley orğan bə çey bı barədə şikayəti pape nıbe. İqlə Səlibe Sorxi numayəndon de Abbasi vindemon kardışone, əmo çə didori bəpeştə zindoni koəkon dey ğeyri-insonə hərəkət dəvom kardəşone.

Taleh Bağırzadə nezə odəmonən bə Rakrus TV jıqo qıley məlumat doəşone ki, zindoni rəhbəriyyət bə Taleh, həmən bə Abbasi əleyh təxribat hozo kardedən. Taleh məcbur kardəşone ki, əv məhbuson arədə dini radikalizmi təbliğ karde barədə bə akti ğol bıkəşo. Əmo ey çimiku imtina karde zınəşe.  Mayə manqi 10-də Ğobustani zindoni rəhbəriyyətiən bə Abbasi işqəncon dəvom doəşe, əvış ijən bə çarmex kəşə.