Polis dionədə dızdi kardəkəson peydo karde zınedəni

Siyəzən rayoni "Dağ quşçu" nomədə qıley di heste. Mayə manqi 1-minə ruji şəvi nimədə dızdon omən həmonə diy sakin Rubabə Adıqezəlova 16 qılə hırdəsə heyvon dızdiəşone. Rubabə xanımi maşki çımiku xəbədo bəcəğin bə Siyəzən Rayoni Polisə şebə şikayət kardəşe.

Əyo bey votəşone ki, keynə dızdon peydo bıkon, bey xəbə bəkarden. Isət çə vaxtiku 2 həftə dəvardə, əmo çe polisonku hiç qıley xəbə ni. Rubabə Adıqezəlova ım əhvolət bo Meydan TV muxbiri qəp jəşe ki, polisonədə hiç kəs bə çey so oməni, hadisə şərait omutəşon ni, nə rizon peqətəşone, nəən hamsuonku jı çi parsəşone. Mılxəs jıqo oxşedə ki, bı barədə hiç qıley təhğiğatə ko bino kardəşon ni. Ey həmən votəşe ki, çəvon di qıley qədə məntəğəy, sakinon həmə yəndı zınedən. Polisi bıpişo həmonə dızdon bə i saat peydo bəkarde.

Diy sakin Nazim Huseynoviən votəşe ki, həni çand kərəy ki, soonədə bız, pəs, kaqı-kijə dızdidən. Bə polisi şikayət hiç qıley nəticə dodəni. Dızdon çe polison tərəfo peştıpurin ki, 16 qilə bızo -pəsədə ibarət qıley qələ dızdiəşone. Zınedən ki, polison əvoni axtar nibəkarden, bə qorə jıqo şuək kardəşone. 

Siyəzən Rayoni Polisə şebədə bə Meydan TV muxbiri votəşone ki, Dağ quşçu diədə tosə ısət mol dızdiə fakt bə ğeyd sə bıəni. Im iminə jıqo hadisəy. Divojon isə votedən ki, diədə cand kərə jıqo dızdə hərəkəton bıən, polisi çəvon səpe oj karde zınəşni.

Umumən isə KİV-on respublika co rayononədən çe divojon mol-mələon dızdie barədə , polisi əvonu təhğiğ nıkarde, dızdon bə oşko bekarde nızıne dair xeyli məğalon bə cəmiyyəti nəzə rosniəşone. Daxili Koon Vəzarəti isə bı nıvıştəyon hiç qıley reaksiya doəş ni.