Az.R-ədə əhali miyonə umr çand sore

Az.R Parlamenti ponə sori məmləkətədə pensiya sınn bə 65 sor ros kardışe. Imən məlume ki, mədəni keşvəronədə jıqo qıley şərt heste, əhali miyonə umri de pensiya sınni arədə fərğ minimum 10-12 sor bənine. Boku hokumətən ıştə məmləkəti, əlbəttə ki, barzə inkişafinə mədəniə keşvər hisob kardedə.

Yəğin bı səbəbən Səhiyyə vəzarəti İctimai Səhiyyə Mərkəzi direktori rəsmən elan kardəşe ki, Az.R-ədə əhali miyonə umr 75 sorisə dəvardə.

"Novoya vremya" rujnomə de ım məsələ əlağədar qıley təhlili məğalə dərc kardəşe. Məğalə muəllif ğeyd kardedə ki, çe dınyo iğtisadi cəhəto normal məmləkətonədə zəhmət ğabiliyyətinə əhali çe pensioneron arədə nisbət 3-4 kərə vey bedə. Əmo Az.R- ədə ım nisbət rəsmən bə 1,5-i bərobəre. Imən ey nişon dodə ki, Respublikadə zəhmət ğabiliyyətinə əhali xeyli hissə bekorən, və Devlətə statistika əvoni niyo kardedə, bə hisob vardedəni. Demiən məmləkəti iğtisadiyyatədə qonə problemon mevcudiyyət bə oşko beşedə.

İyo zəhmət ğabiliyyətinə şəhrıvandon arədə vəfat, çe inkaşaf kardə keşvəronsə 2 kərə veye. Məsələn, 2016-minə sori təğribən 30 həzo nəfər merdi vəfot kardəşe ki, çəvon 44% zəhmət ğabiliyyətinə odəmon bıən. İm, Az.R-ədə iğtisadi vəziyyəti qon bıe səbəbiku əhali quzərani səviyyə çanədə saru bıe nişon dodə.  Muəllif ımiən ğeyd kardedə ki, avanqardə devləton ıştə Umumdaxili Məhsuli 10-15% -i ğədər vəsaiti bəştə şəhrıvandon rifahi xarc kardedən, Az.R-ədə isə ım xarc UDM-i 3-4% ğədərədəy.

Az.R dırozəumrinə şəhrıvandon miğdarədən xeyli dumoədə mandedə. Məsələn, hamsuə Qurcistanədə sınnış 80 sori dəvardə odəmon çe məmləkəti əhali 3,4%-i təşkil kardedəbu, Az.-R-ədə ım rəğəm 1,3%-e. Jiqo vəziyyət Səhiyyə Vəzarəti elan kardə həmonə rəğəmi səpe şubhə bə əməl vardedə.