Az.R-də ərzaği ğıymət boçi boho bedə

Az.R Devlətə Statistika Komitə yanvariku tosə aprelə manqi məmləkəti vıjoronədə ərzaği ğıyməti 3,7%, ğeyri-ərzağə məhsulon ğıyməti isə 4,1% boho bıe elan kardışe. "Sputnik.az" sayt ğeyd kardedə ki, ım peros , əsasən çay, beməyə ruən, mivə və tərəvəz məhsulon qıymətonədə vey muşahidə bıə.

Əqər jıqo infilyasiya əsasə səbəb məmləkətədə daxili və xarici ticarəti səpe sərt monopoliya rejimi mevcud beyebu, dıminə səbəb di təsərrufati sahədə behrani hələən dəvom kardeye. Yəğin bı səbəbe ki, Əliyevi ım vəzarəti sərdar əvəz kardışe. Isət tojə nazir ASAN xidməti sabiğ sərdar İnam Kərimov rayonon nəvedə, de fermeron problemon oşno bedə, əvoni həll karde barədə vəhədon dodə.

İğtisadi Tədğiğaton Mərkəzi ekspert Vahid Məhərrəmli bə ım məsələ bədbin diə kardedə, votedə ki, fermeron çe monopoliston çanqiku roxnie lozime. Əmo Respublikadə monopoliya şe-şe həniən zumand və hevuj bedə. Oliqarxon diədə zəminon zəbt kardedən, çe fermeron, diqər zəhmətkeşon dasto sedən, di təsərrufati həmə sahon - istehsal, emal, ticarət, ixraci bəştə dast ovoştınidən. Ğıymətonən de vıjori ğanunon ne, məhz monopoliston təyin karde səbəbiku, Respublika vıjoronədə məhsulon daima boho bıe, infilyasiya dəvom karde labud qıley vəziyyəte.

 Məhərrəmli həmən ıştə "Fasebook" səhifədə bə ponə sori muvafiğ devri nisbətən ımsori 3 manqədə bə keşvər qandımi idxali 54%, beməyə ruəni idxali 37%, mivə 51, çay 18, qujd və şıtə məhsulon idxali isə 30% ziyod bıe ğeyd kardışe.

"Azadlıq.info"ən Masəlu şəhrestani Sirəbil di camaati kəfşənə zəmini Rayoni icra hakimiyyəti tərəfo zəbt bıe barədə nıvıştəşe. Diy camaati bə devləti muxtəlifə orğanon kardə şikayəti hic qıley nəticə doə nişe.