Hisobkardə Palata budcə vəsaiti icradə xeyli noğsanon bə oşko bekardəşe

Az.R Hisobkardə Palata sədr Vuğar Qulməmmədovi Palata bə 2017-minə sori fəaliyyəti dair hesabat bə Milli Məclisi təğdim kardəşe.

Dəvardə sori ım təşkilati 135 qılə muəssisədə audit bardəşe, 689 qılə vəziyyətədə noğsanon bə oşko bekardəşe. Muəyyən bıə ki, çe devlətə budcə 42 milyon 110 həzo mənot vəsait bə co məğsədon xarc kardəşone.

Çe Sosial Mudafiə Vəzarəti Sosial Mudafiə Fondi muhasibatə sənədonədə xeyli maliyyə nırəsəyon və diqər maxinasiya fakton bə oşko bekardəşone. Əhali pensiya təminatədə bə ğanuni tələbon tam əməl kardə bıə ni. Bə 181 nəfəri vəfati bəpeştə 624 həzo mənot, bə 35 nəfəri eyni vaxtədə 2 mənbədə pensiya avjor karde nəticədə 319 həzo mənot məbləğədə ziyod pul xarc karde məlum bıə. Bə ko kardə əlilon doə ziyodə pension məbləğiən 1milyon 92 həzo mənot təşkil kardəşe.

Jıqo illəton "AZAL", "Azərbaycani İpoteka Fond"ədən bə oşko beşə.

Hisobkardə Palata 76 qılə devlətə təşkilaton 2 milyard 101 milyon mənot məbləğədə debitorə ğarzi mevcud bıe muəyyən kardəşe. Mədəniyyət və Turizm, Səhiyyə, Təhsil, Nəğliyyat, Di Təsərrufat vəzarəton həmonə ğarzoxoə təşkilaton restədən.

Im hesabati muzakirədə deputat Ğodrət Həsənğuliyevi  budcə vəsaiti ğeyri-ğanuniə məsrəfi ro doə məmuron bə məsuliyyət cəlb bıe təklif kardəşe.

Deputat Vahid Əhmədoviən ğeyd kardəşe ki, qıley nazir çe vəzifəku bekardə bəpeşt məlum bedə ki, ey çand milyard vəsait dələmurd kardəşebən. Im bə Hisobkardə Palata koy səpe soğnə eğandedə. Hərçənd ki,  palata bevasitə bə Parlamenti tabeye. Əv ıştə bardə auditon nəticon barədə bə deputaton muntəzəm məlumat bıdo, ayəndə vaxtonədə ım curə anormal vəziyyəton bə miyon benıbəşen.