Abbas Huseynovi moə bə İlham Əliyevi muraciət kardəşe

Nardarani faciə məhbus Abbas Huseynovi moə Rəhimə Huseynova bə Azadi Radio məlumat doəşe ki, Ğobustani zindonxonə mudriyyət bə Abbasi əleyh təxribat hozo karde fikirədəy.

Bi təxribatədə hətto ey kışteyən bəzınen. Mayə manqi 17-ədə Abbasi bə kə zanq kardəşe, votəşe ki, zindoni koəkon bey besəbəb dıjmon dodən, ey təhğir kardedən, hətto çey handə Ğıronşonən dırniə.

Rəhimə xanımi bə prezident İlham Əliyevi muraciətən votəşe ki, bə çey məhbusə zoə jimoni xəto heste, "Cənab prezident, çoko bedə ki, şımə bə Ğıroni das noəyone, ğəssəm hardəyone ki, həmə şəhrıvandon huğuğon təmin bəkardeyon, əmo devləti ğanuni mudafiə kardənin bıə şəxson həmonə Ğıroni dırnidən".

Penitensiarə Xidmətədə bə ım Radio muxbiri votəşone ki, bə Abbas Hüseynovi təzyiğon bıe barədə votəyon bə həğiğəti muvafiğ ni.

Ğobustani zindonədə bə Nardarani faciə diqər məhbus, Mısılmonon İbemonə Hərəkati sədr Hacı Taleh Bağırzadə munasibətədən təzyiğ bə təhdidon dəvom hestışe. Ey bə "Azadlıq.info" xəbə rosniəşe ki, bəvon bıə təzyiğon mənbə Prezidenti Aparate. Bı barədə dəsturon həmə çəğono omedə. Hacı Taleh hokumətış dəvət kardə ki, bə dindarə məhbuson munasibətədə bə deşmenə hərəkəton orəx bıdon.

Bə Dini Təşkilaton dair Devlətə Komitə sədr Mubariz Ğurbanlı votəşe ki, "Azərbaycanədə hiç kəs devləti tərəfo bəştə əğidə və etiğadi xatır bə təhdid və təzyiğon məruz mandedəni."