Hokuməti təsərrufatədə bardə islahati nəticon

Əliyevi hokuməti 2015-minə soriku di təsərrufatədə bardə islahati ısət konkret nəticon vinde mumkune. Az.R KİV-ədə bı barədə bə xeyli məğalon rast omə bedə.

Hokumət bı islahatonədə bə pambəvonəti inkişafi prioritet əhəmiyyət dodəbe. Meydan TV nıvıştedə ki, 2015-minə sori məmləkətədə 35 həzo ton, 2017-minə sori isə 207 həzo ton, yəni  6 kərə vey pambə tədaruk kardəşone. Bı soronədə pambə kaştə zəminon 19 həzo hektariku bə 136 həzo hektar ros bıə. İmən  heyvandarəti sahə fermeron muflis kardəşe. Beyləqan rayoni Milabad di sakin Saleh Məmmədov votedə ki, aləfə hionədə məcburən pambə kaştəşone. Bo heyvonon çovnie, zımhor tədaruk karde ro kəfşən nımande səbəbiku ıştə heyvonon həvate məcburiyyətədə mandən. Pambən çəvonku anədə erjon hıridən ki, boəvon kopik-ğoruş mandedə.

Di təsərrufati təhlilqəron təsdiğ kardedən ki, pambəvonəti inkişaf kardovnie məmləkətədə heyvondarəti məhsulon istehsali saru eqıne, bə ım məhsulon ğıyməti boho bıe səbəb bedə.

"Azadlıq.info" xəbə dodə ki, Devlətə Statistika Komitə ımsornə yanvariku tosə aprelə manqi məmləkətədə şəkəri istehsal 85% kam bıe elan kardəşe. 2017-minə sori şəkəri istehsal bə 2016-minə sori nisbətədə 190 həzo ton bə kam bıəbe. İmən ey nişon dodə ki, Az.R iğtisadiyyat bı sahədə tamamən çe idxaliku bə jidastiə vəziyyət eqıniə.

Ekspert Vahid Məhərrəmli ğeyd kardedə ki, məmləkəti bə ərzağə qandımi i sornə daxili tələbat 1 milyon 400 həzo tone. Har sor çe xarico tosə 1 milyon 600 həzo toni qandım bə keşvər idxal kardedən. Yəni ım sahədən çe xariciku jidastiəti bə 100% rəsə.

Əliyev hokuməti bardə kıvləvonəti inkişaf kardovniə siyasətiən bey vardəşe bekardəşe ki, ısət di məktəbi muəllim və əğılə bağçə tərbiyəkaron məcbur kardedən ki, əvon kıvlə bıqəton. Meydan TV muxbiri Fizuli rayoni Haramı di miyonə məktəbi muəllimon sinifə otağonədə  kıvlə qəte barədə məlumat bə Respublika cəmiyyəti nəzə rosniəşe.