Ayətullah Seyid Əli Xamenei Avropa vədə çe İİR şərton noşe

İMT Atomiə Enerji Aqentiyyəti numayəndə mayə manqi 24-minə ruji bəyon kardəşe ki, İroni tərəf bə nuvə muğavilə dair bəştə ehdədarion hələən əməl kardedə.

Mayə manqi 7-ədə Amerika tərəfi ım muğaviləku beşe dınyo cəmiyyətədə bə yolə əks-sədo səbəb bıe. Hətto çe Avropa 3 qılə devləton ki, bı muğavilədə iştirak hestışone, bə ım xəbə de norohəti munasibət nişon doşone.

"İslamazeri.com" sayt bə İroni mass-media istinadən xəbə dodə ki, İslamə İnğilabi Yolə Dini Rəhbər Ayətullah Seyid Əli Xamenei de İroni devlətə rəsmiyon vindemonədə votışe ki, İİR de Amerika həmkarəti karde nibəzıne, bə səbəb ki, əv bəştə doə vədəon əməl kardedəni.

Yolə Rəhbəri həmən de Avropa devləton bə nuvə proqrami dair muzakironədə çe İroni tərəfi şərton elan kardışe, votışe ki, AİŞ ım ğəror bə İMT muvafiğ ğətnomə zidde, avropavojon bə Əmniyyəti Şura bə Amerika ım hərəkəti etiraz kardə ğətnomə təğdim kardəninin. Avropa de İroni nuvə muğavilədə iştirakkardə 3 qılə devləton bəpe bəştə ehdə peqəton ki, İroni raket proqrami və reqionədə iştirakı vədə məhdudiyyət bə nav nıbədon.

Həzrəte Ayətullah Xamenei ımən ğeyd kardışe ki, əmə avropavojon navkonə siyasəton nəzərən bəvon etimad nimone, bı səbəbən əvon bəmə real zəmonəton bəpe bıdon ki, çe Amerika bə İroni ticari və maliyyə sanksiyon muğabilədə avropavojon çimi təsiri kam karde ro əməli tədbiron bəvinden. Qirəm əvon ım tədbironədə beholəti nişon bıdon, jəqo İroni tərəfi həxış heste ki, ıştə nuvə fəaliyyəti bərpo bıkə.

İslamə İnğilabi rəhbəri həmən votışe ki, əqər nuvə muğavilə besəmər bıe yəğin bıkəmon, bəvədə  atomi qəncin kardə fəaliyyəti bərpo bəkardemon.