Az.R-ədə dəvo monopoliya çiki dastədəy
Az.R iğtisadiyyati həmə vəsilon tamam çe monopoliston inhisardə bıe ısət hic kəsiku şubhə bə əməl vardedəni. Dəvo ticarəti sahə çe bə ali hokuməti nezə odəmon inhisarədə beyən bə həməkəsi məlume.
"Azadlıq.info" məmləkətədə dəvo ticarəti bə mafiya nəzarəti ji eqınie nəticədə şəhrıvandon jimonədə bə əməl omə işkilon barədə məqalə bə ıştə əhandon nəzə rosniəşe. Bokuədə 32 sınninə cıvon bey "Seftrikasion" darzən je nəticədə bə marde hol eqınidə. Xıdoku bedə ki, ey çe mardeku roxnie mumkun bedə. Həmonə noxəşini nezə odəmon ım darzəni ampula peqətedən şedən bə ıştə dustə doktori nişon dodən. Əv təsdiğ kardedə ki, ım dəmon çe Sumğayıti dəvoə muəssisə istehsale. Bə muəssisədə dəmonon istehsalədə ciddiə illəton və nırəsəyon hestin. Bə çəvon tərkibi, umjənə komponentə proporsion sərost əməl kardə bedəni. Həmonə doktori votəşe ki, ım darzəni bə çand qılə noxəşini marde, və ya bə şok vəziyyət eğande bə çey ıştəni məlume. Həmonə 32 sınninə noxəşini çe mardeku perəxe səbəb çey orqanizmi muğaviməti zumandbekue. İm dəmoni xaricədə istehsal bıə numunon bənə antibiotiki çokə pereparatin. Əmo Respublika istehsal məlum səbəbonku bo əhali saleməti xəto bə əməl vardedə. Jıqo xətomandə dəvocaton siyahiədə xeyli pereparaton nomon hestin. Bı həxədə Respublika Mass-medion çand bəjəm nıvıştəşone. Əmo vəziyyət bə səhmon eqınidəni. Səhiyyə Vəzarət ım koy bə nəzarət peqətənine. Əmo çe devləti bı ğədər səlahiyyətinə təsisati tosə ısət bə ım problemi əncom kəşe zuş vışkidəni. Məqəvuji çe ım dəvo mafiya peştədə vey ali məğaminə məmuron mandedən.
