Naxçıvanədə sosial vəziyyət çı curəy

Çand rujon çimi bənav İlham Əliyevi bə Naxçıvan səfərədə bəyon kardışe ki, ım Muxtarə Respublika iğtisadiyyat de yolə surəti inkişaf kardedə. Orəxnə 15 sorədə çey umumdaxili məhsul 10 kərə ziyod bıə. Im dınyo miğyasədə rekord nəticəy.

Əliyev çe həmonə səfəro oqardəcəğin bo Naxçıvani iğtisadi və sosial inkişafi ro 55 milyon mənot vəsait co kardışe. 2018-minə sori bə Naxçıvani çe devlətə budcəku 282 milyon mənot dotasiya nəzərədə qətə bedə. Navonə har soronədən bəvrə təğribən anədə dotasiya doəşone. Bo muğayisə ro vote lozime ki, ımsornə budcədə bo Az.R əmandənə rayonon ki, bə Naxçıvani nisbətədə əhaliş 20 kərəsən veye, devlətə budcəku cəmi 75 milyon mənot dotasiya co kardə bıə. Naxçıvani iğtisadiyyati 15 sorədə 10 kərə ziyod bıe çəvrey əhali quzərani barz , həmən bə devlətə budçə çey avjor kardə verqi ziyod kardənin bıe, bey doə dotasiyan sorbəsor kam bənine. Əmo Prezidenti bə i bəjəm bə Naxçıvani əlavə 55 milyon vəsait co karde nə iğtisadi , nəən məntiği əsasış ni.

Azadi Radio de ım məsələ əlağədar təhlil bardəşe. Məlum bıə ki, orəxnə soronədə, məxsusən çe mənoti devalvasiya bəpeştə, naxçıvanıjon bə Turkiyə muhacirət xeyli vusətin bıə. Çimiən əsas səbəb bekorətie. Nə Turkiyə nəən Az.R hokumət bə Turkiyə muhacirət kardə azərbaycanıjon miğdari barədə məlumat dodənin. Naxçıvanıjə muhacir Elşad Seyidi bə Radio muxbiri votəşe ki, Turkiyədə azərbaycanıjə muhaciron arədə naxcıvanıjon əksəriyyət təşkil kardedən. İstambulədə hətto Nehrəm nomədə məhəllə heste. Turkiyədə rəsmi ğeydiyyato dəvarde çətin bıe səbəbiku, əvon beicazə iyo jidən. Bə qorə  çəvon əğılon bə məktəb peqətedənin. İqlə bə məktəb nışə naxçıvanıjə hırdənon miğdar təğribən 13 həzo nəfəre.

Azərbaycani Demokratə Partiya sədr Sərdar Cəlaloğlu votedə ki, Muxtarə Respublika əhali 80% -i əvrə tərk kardəşe.

Jıqo  vəziyyətədə  qıley pars bə miyon beşedə: 10 ğatnə iğtisadi inkişaf  bəs boçi bə əhali quzərani çok bıe təsir nişon doe zınedəni?