İnvestoron bə Az.R iğtisadiyyati boçi sərmoyə nodənin

Daşkəsənədə qıley filizsofkardə muəssisə heste. 1954-minə soriku fəaliyyət nişon dodəbe. 2001-minə sori ım muəssisə səpe "Daskəsən Filizsofkardə" Ojə Səhmdarə Cəmiyyət onoşone.

2016-minə sori iyulə manqiku de ilham Əliyevi dəsturi bə Mılkə Məsəlon dair Devlətə Komitə balans ovoştonişone ki, bə investoron havatə bıbo. De ım məğsədi həmonə sori sentyabrədə auksion dəvarde. Əmo ey hıriə investor peydo nıbe.

Azadi Radio xəbə dodə ki, de ım hisobi 6-minə auksioni vaxt mayə manqi 31-ədə bə orəx rəse. Bı səfən bə ım muəssisə sərmoyə noəkəs bə meydon benışe. Isət Mılkə Komitə nubəti musabiğə bə tojə sori yanvarə manqi 1-minə ruj təyin kardəşe.

Kali təhlilqəron ım auksionon sə nıqəte səbəbi, çey şərton bo investoron qon beədə vindedən. Əmo obyektivə eksperton fikir jıqoe ki, Respublikadə umumən investisiya muhit xeyli qıvonine. Monopoliya, məhkəmə - huğuğ sistemədə mevcud bərbodə vəziyyət, tosə ısət inhisarçion bə xariciə investoron qətə divonon, çəvon biznes və mılkon dastonkuşon se dair behisobə fakton hestin. Bə de cənqəli ğanunon idarə bıə iğtisadiə muhiti sərmoyə  noe ro investor peydo karde vey illətinə məsələy. 

Azadi Radio həmən bə Maliyyə Vıjoron Nəzarətə Palata hesabati barədə məlumat pevolo kardəşe. Çe ım hesabatiku oşko bedə ki, ım sori sıftənə 4 manqədə Respublika bankon 57 milyon mənot ziyan kardəşone.  Imən məmləkəti iğtisadiyyati maliyyə sektorədə behrani hələən dəvom karde nişon dodə.