Hokumət bə muxalifə fəalon divon qətedə

Mayə manqi 28 -ədə REAL hərəkati uzvon Boku şəhərədə de Azərbaycanə Cumhuriyyəti 100-minə sorəqardışi əlağədar qıley şemon təşkil kardışone.

Əmo şəhəri polisə ğıvvon ım tədbir dətojnişone, 4 nəfər siyasiə fəal bə 25-30 sutkə muddəti zindonə cəzo məhkum kardışone. REAL hərəkati numayəndə Natiğ Cəfərli bə "Azadi Radio" xəbə doəşe ki, çəvon hərəkati 15 nəfər uzvən mayə manqi 31-ədə bə polisxonə vanq kardəşone, bəvon çəşnavi doəşone ki, jıqo siyasi hərəkətonku dast bıkəşon.

Bə Azadi Radio muxbiri bı məsələ dair parsi Daxili Koon Vəzarətədə cəvob se mumkun bıə ni. Əmo İlham Əliyev və çey məmuron daima məmləkətədə şəhrıvandon sərbəst qırdbemonə azadi təmin bıe bəyon kardedən.

Respublika Prokuratura de Daxili Koon Vəzarəti bahəm Azərbaycani Xalqə Cəbhə Partiya sədr Əli Kərimli, "Azadlıq" rujnomə redaktor Qəniumət Zahid, Qədəbəq rayoni İcra Hakimiyyəti sabiğ sərdar Saleh Rustəmov, çey bıyə zoə Vidadi Rustəmli və AXCP 7 nəfər fəali barədə cinayətə ko bino karde həxədə məlumat pevolo kardəşone ki, məvotbən əvon de çırkinə pulon şışte məşğulinbən.  Im fəalonədə 4 nəfər polison tərəfo dəstqir bıən. Tosə məhkəmə bə 4 manq muddətinə zindon dənoəşone.

AXCP sədr Əli Kərimli ım ittiham rədd kardəşe, çe hokuməti bə Partiya bənə nubətinə provakasiya ğıymət doəşe.