Di təsərrufatədə inzibati usuli-idarə ocizanə nəticon

Əliyev hokuməti di təsərrufati inkişaf kardovnie ro əyo monopoliya və inzibati usuli-idarə bərpo karde ısət ıştə fəsadon nişon dodə. Tarixiə təcrubə subut kardəşe ki, iğtisadiyyati ım sahə inkişafi ən sərostə ro zəmini bə azadə kaştəvonon doe, bo çəvon azad fəaliyyəti şərait soxteədəy.

Çe Sovet hakimiyyəti kolxoz-sovxoz sistemi effektin nıbe, çey məmləkəti de lazımi ğədər ərzaği təmin karde nızıne səbəb zəhmətkəşon səpe inzibatiə idarə sistemi hokumranəti kardeədə bıe.

Bı rujonədə Respublika KİV-on Saatlı rayoni Sımada diədə 26 nəfər pambəvonə fəhlon kimyəvi pereparaton səbəbiku zəhrəlud bıe xəbə bə ictimaiyyəti rosnişone. Çəvonədə 3 nəfəri səhhət  qon bıe səbəbiku bə Boku dəro kardəşone. Əmandənə 23 nəfər bə Saatlı Kliniki Tibbi Mərkəzi toksikoloqiya sebə dəğandəşone. Bə çəvon ko kardə pambə hi 4 ruj bə nav  zəhərinə kimyəvi pereparat peşandəşonebən. 15 ruj əyo ko karde mumkun nəbi. Zərərdidəonədə 1 nəfər polis, 4 nəfər Təciliə Tibbiə Koməki həmkaronin. Əvon fəhlon çe hiyo bekarde ro bə komək omən, ıştənən zəhərəlud bıən. Bokuku i dastə tibbi mutəxəssis bə Saatlı omən, bə ım noxəşinon mualicə bino kardəşone. 

Kıvləvonəti inkişaf kardovnie barədən inzibati dəsturon bə xeyli mışğılon səbəb bedə. Meydan TV xəbə dodə ki, Qeranboy rayoni Nizami diy əğılə bağçədə, Qeyçay rayoni Ulaşlı diy miyonə məkətəbədə  kıvlə perosnidən. Valideynon bımi etiraz kardəşone, əmo ımi nəticə doə nişe. Rayoni rəhbəriyyəti votəşe ki, ım çe devləti sərdari dəsture, ey mitləğ icra karde lozime.