Məmləkətədə siyasi repression dəvom kardedə

Siyasiə məhbuson Monitorinqə Mərkəzi bə ımsori 6 manqi dair ıştə hesabat pevolo kardəşe. "Azadlıq.info" bə "Amerika sədo" radio əsasən xəbə dodə ki, Monitorinqə Mərkəzi ım hesabatədə Boku hokuməti bə siyasiə fəalon munasibətədə ıştə repressiv hərəkəton həniən zumand karde məxsusi ğeyd bıə.

Prezidentə entexabaton ərəfədə "Mısılmonon ibemonə Hərəkati" 3 nəfər, AXCP 6 nəfər uzv, Avropa siyasiə muhaciron əvlodonədə 2 nəfər polison dəstqir kardəşone.

Entexabaton bəpeştən jıqo repressiyon dəvom kardəşe. AXCP fəalon Orxan Baxışlı mayə manqi 3-ədə, Mirfeyzulla Seyidov həmonə manqi 9-ədə  de pesoxtə narkotika ticarəti ittihami bə zindon dənoəşone, bə çəvon əleyh cinayətə ko bino kardəşone.

Mayi 25-ədə AXCP uzvonədə 5 nəfər de "çırkinə pulon şışte" ittihami dəstqir bıən.

Mayə manqi 28-ədə AXCP, "Musavat" və REAL hərəkati 7 nəfər fəal bə 10 sutkəku tosə 30 sutkəninə  zindonə cəzo məhkum bıən.

"Milli Şura" sədr Cəmil Həsənli ıştə "feyzbuk" səhifədə nıvıştəşe ki, hokuməti ım repressiya hərəkəton həmən de şiddətinə işqəncon muşayət bedən. "Bandotdel" nominə qıley antikonstitusionə vəsilə həmən işqəncə dokəson lonəy. İyo bə məhbuson hətto de elektrikiən işqəncon dodən. Az.R bə bəşəri huğuğon dair beynəlxalğə Konvensiya umjən qıniə, bəştə ehdə peqətəşe ki, bə məhbuson işqəncə nibədo. Əmo hokuməti məmləkətədə bənə Qestapo ğəzinə qıley repressiya şəbəkə onoəşe.

Əliyevi hokumət isə məmləkətədə siyasiə məhbuson mevcudiyyəti inkar kardedə.