Az.R-ədə bərğ, ğaz və ovi puli boho karde pidəşone

"Azərenerji" və "Azərişıq" Ojə Səhmdarə Cəmiyyəton bə Respublika Tarif Şura bərği ğıyməti boho karde barədə muraciət vığandəşone. "Azadlıq.info" bı barədə nıvıştedə ki, ım enerji ğıyməti təğribən 2 kərə ziyod karde, bə 14-16 kopiki rosnie nəzərədə qətə bedə.

Haliyədə 1 kilovat bərği ğıymət tosə 350 kv.saat məsrəfi 7 kopik, çeysə bəpe bə 11 kopike. Im təbii monorpolistə muəssison ğaz və ovi ğıymətonən ros karde ro bə Tarif Şura muraciət kardəşone. Çəş kardə bedə ki, çe iyulə manqi 1-minə rujiku bı barədə ğəror ğəbul kardə bıbo.

Respublika rəsmi statistika məmləkətədə beçizəti səviyyə 5% -i ğədərədə nişon dodə. Imən çe dınyo ən firəvanə keşvəron səviyyədəy. "Contakt.az" sayt bə "Novoe vremya" rujnomə əsasən ım rəğəmi Az.R-ədə realə vəziyyəti əks nıkarde həxədə nıvıştəşe. Həmonə rujnomə ğeyd kardedə ki, Respublikədə minimum məvacib 155 mənot , yəni 91 dollari ğədərədəy. Hərçənd ki, İMT Ticarət və İnkişaf konfransi i rujnə mədaxili 5 dollar bıe bənə beçizəti həddi muəyyən kardəşe. De ım hisobi Az.R-ədə minimum məvacib 150 dollar, jəni 255 mənot bənine.  Dınyo Banki isə elan kardəşe ki, ə odəm ki, 1 rujnə mədaxilış minimum 6 dollare, əv beçiz hisob bənine. Yəni de ım ulqu Az.R -ədə tosə 300 mənoti məvacib səkəson bə beçizon kateqoriya daxilin. De ım hisobi Respublikadə beçizəti səviyyə 5 % ne, 30 % -sən bə peye.

Əhali jimoni ım ğədər kosib bıə şəraitədə elektriki ğıyməti bə i bəjəm, ikkərəti təğribən 100 % boho karde, Boku hokuməti bəştə şəhrıvandon tale çanədə biqonə və bietina munasibəti numayiş kardedə.