Pambəvonon zəhrəlud bıe dəvom kardedə

İyunə manqi 19-minə ruji İmişli rayoni pambə hiyonədə fəhlon kutləvi zəhrəludə hadisə vağeə bıə. Rayoni Mərkəzi Mərizxonə sər doktor Cəsur Paşayevi bə Azadi Radio votəşe ki, 40 nəfər pambəvon zəhrəlud bıe səbəbiku bə mərizxonə dəğandəşone.

İmişli rayoni deputat Çinqiz Ğənizadə zəhrəlud bıəkəson miğdari 45 nəfər nişon doəşe. Huğuğə mudafiəkar Oqtay Quləliyevi bı barədə qıley məlumat pevolo kardəşe, votəşe ki, 300 nəfər zəhrəlud bıə, mərizxonədə vırə nırəse səbəbiku zərərdidon mərizxonə soədə bə vırə kardəşone. 10 nəfəri vəziyyət qıvonin bıe səbəbiku bə reanimasiya şebə dəğandəşone.

Çimi 3 ruj bə nav Tərtər rayoni pambə hiyonədə 14 nəfər pambəvonən zəhrəlud bıəbin. Jıqo hadisə iyunə manqi 10-də Saatlı rayoni Simada diy pambə hiədə bə 24 nəfər pambəvoni kimyəvi  pereparatonku zəhrəludi səbəb bıəbe.

Çe Di Təsərrufati Vəzarəti Devlətə Fitosanitarə Nəzarətə Xidməti bə Azadi Radio parsi cəvobədə votəşe ki, beməyon çe noxəşi, ziyanavəron və həloğonku muhafizə karde ro pestisidono istifadə karde zərurie. Im koon icra kardəkəson bə muəyyən ğaydon əməl karde çəmə tərəfo nəzarətə tədbiron bə jimon dəvuniə bedə. Pestisid peşandə hionədə muvafiğ nışonon ejənedəmon, bə ətrofi əhali bı barədə çəşnavi dodəmon.

Di təsərrufati ekspert Vahid Məhərrəmli ğeyd kardəşe ki, pambə hionədə jıqo hadison çimi bəpeştən dəvom karde bəzıne, çunki İlham Əliyevi de "Strateji Roy Xəritə" əlağədar doə fərmanədə dəstur doəşe ki, beməyon muhafizə karde ro kimyəvi pereparatono istifadə 25 % ziyod kardə bənine. Imən məmlkəti pambə hionədə bə jıqo bədbəxtə hadison səbəb bedə.