Di təsərrufatədə taxıləvonon problemon

Tovıstoni sıftənə manq Az.R taxıləvonə vilayətonədə taxıli dıve vaxte. "Maide.az" sayt xəbə dodə ki, Qeyçay, Bərdə, Tərtər, Ağcabədi, Zərdab rayononədə kombayıni nırəse səbəbiku, qandım və cəvə hion dıve bə di dəqınedə.

"Aqrolizinq" Ojə Səhmdarə Cəmiyyəti şebə mudiri bə "Yeni Musavat" rujnomə votəşe ki, haliyədə Respublikadə 2700 taxıldıvə kombayn heste. Cəvonədə 2400 qılə məmləkəti taxılə məzə`onədə deven bardedən. Əsas mışğıl bımədəy ki, çəvon 52% -i istismarə muddət bə orəx rəse səbəbiku, rə xərob bedən.

"Sputnik.Azərbaycan" saytən Qax rayonədə kombayni nırəseku taxıli məzə`ədə zay bıe faktonku xəbə doəşe. Rayoni Ğərətala diy sakin Əhmədiyyə Musayev votedə ki, kombaynı nıbe bə məhsuli vaxtədə dıve imkan dodəni. Bə qorə bə ziyan dəqınidəmon.

Jıqo vəziyyət Şəki rayoni Cunut, Qeynuk, Biləcik, Cuma dionədə, həmən Qeranboy rayonədən mevcude. Çe Qeranboy Eyvazlılar diy sakinon bə sayti zona muxbiri məlumat doəşone ki, kombayn nıbe səbəbiku çəvon perosniə məhsul zay bedə. İyuni 5-ədə əvon bəpe taxıli bədıvin, 15 ruj dəvardə, əmo tosə ısət bə çəvon di kombayn doəşon ni.

İğtisadşunas ekspert Qubad İbadoğlu bə "FaktXəbər" sayti votəşe ki, rayononədə "Aqrolizinqi" şebon çe icra sərdaron inhisarədəy. Əvon kombaynon bəştə nezə odəmon bə icarə dodən. Bı səbəbən sodə zəhmətkəşon ıştə məhsuli vaxtədə dıve zınedənin, çəvon de kom zəhməti perosniə məhsul poyımol bedə. İmən monopolizmə siyasət və rışvəxorəti bə əməl vardə  befərə usuli-idarə ocizanə qıley nəticəy.